ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ (RInC) ᐅᑭᐅᖅᑕᖅᑐᕐᒥ

ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ ᑲᓇᑕᓕᒫᒧᑦ ᑐᕌᖓᓪᓗᑎᒃ ᐱᓕᕆᐊᒃᓴᐅᔪᑦ ᑐᓴᖅᑎᑦᑎᔾᔪᑕᐅᓚᐅᖅᓯᒪᔪᑦ ᑮᓇᐅᔭᖅᑐᕈᑎᒃᓴᓂ 2009ᖑᑎᓪᓗᒍ, ᑖᒃᑯᐊ ᐊᑐᖅᑕᐅᑲᐃᓐᓇᕐᓂᐊᖅᑐᓂᒃ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑎᖃᓚᐅᖅᑐᑦ $500 ᒥᓕᓐᐊᓂᒃ ᐊᑐᖅᑕᐅᓂᐊᖅᑎᓪᓗᒋᑦ ᑲᓇᑕᓕᒫᒥᐅᓄᑦ ᒫᓐᓇᒥᑦ ᑎᑭᓐᓇᓱᐊᕐᓂᖓᓂ ᒫᔾᔨ 31, 2011, ᐊᑭᓕᐅᑕᐅᓂᕐᓗᑎᒃ ᓱᕋᒃᓯᒪᔪᓂᒃ ᓴᓇᔾᔪᑕᐅᓗᑎᒃ, ᓄᑖᕈᕆᐊᖅᓯᔾᔪᑕᐅᓗᑎᒃ ᐊᒻᒪ ᐊᖏᒡᓕᒋᐊᖅᑎᑦᑎᔾᔪᑕᐅᓗᑎᒃ ᐱᓐᖑᐊᕐᕕᓕᕆᓂᕐᒧᑦ ᐱᖁᑎᕐᔪᐊᓂᒃ ᑲᓇᑕᒥᐅᑦ ᓄᓇᓕᖁᑎᖏᓐᓂ.  ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ ᐱᔨᑦᓯᖅᑐᑦ ᐊᖅᑯᑎᒋᔭᐅᓪᓗᑎᒃ ᐊᒡᒍᖅᑐᖅᓯᒪᓂᕐᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᕝᕕᒋᔭᖏᑦ.

ᐱᓕᕆᐊᒃᓴᐅᔪᑦ ᐊᖏᖅᑕᐅᓯᒪᔪᑦ ᐊᑐᕐᓗᒋᑦ ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ ᐱᔭᕇᖅᑕᐅᓯᒪᔭᕿᐊᖃᖅᑐᑦ ᐃᓱᐊᓂ ᒫᔾᔨ 2011, ᐊᒻᒪ ᑎᑭᑦᑐᓐᓇᖅᑐᑦ $1 ᒥᓕᐊᓐᓄᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑮᓇᐅᔭᖃᖅᑎᑕᐅᓗᑎᒃ.  ᑲᓇᑕᐅᑉ ᒐᕙᒪᒃᑯᖏᑕ ᑮᓴᐅᔭᖃᖅᑎᑦᑎᓂᖏᑦ ᐃᓘᓐᓇᖏᓐᓂᒃ ᐱᕕᒃᓴᐅᔪᓂᒃ ᑭᒡᒐᖅᑐᐃᒐᔪᒃᐳᑦ 1\3−ᓗᐊᖓᓂᒃ ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ ᐱᓕᕆᐊᖏᑕ ᐊᖏᓐᓂᒃ.  ᐊᔾᔨᐅᖏᑦᑐᒃᑯᑦ, ᑮᓇᐅᔭᖃᖅᑎᑦᑎᔪᓐᓇᖅᑐᑦ ᐅᕝᕙᓪᓗᐊᖓᓂᒃ 50%ᖓᓂᒃ  (ᑖᒃᑯᐊ ᐱᖃᓯᐅᔾᔨᓯᒪᔪᓐᓇᖅᑐᑦ ᒥᑭᑦᑑᑎᓂᒃ ᓄᓇᓕᐅᔪᓂᒃ ᕼᐊᒪᓚᖓᑦ ᑖᒃᓯᔭᐃᖏᑦᑐᓂᒃ), ᑭᓯᐊᓂᓕ ᐊᖏᓂᖅᐹᖑᔪᖅ ᐱᔭᐅᔪᓐᓇᖅᑐᖅ $1 ᒥᓕᐊᓐ.

ᐱᓕᕆᐊᒃᓴᓄᑦ ᐃᓚᐅᔪᓐᓇᕐᓂᖅ

ᐱᖃᑕᐅᔪᓐᓇᖅᑐᑦ ᑐᒃᓯᕋᐅᑎᓕᐅᖅᑐᑦ

• ᕼᐊᒪᓚᒃᑯᑦ ᐊᒻᒪ ᓄᓇᓕᖕᓂ ᒐᕙᒪᖏᑦ, ᑎᒥᐅᔪᑦ ᐱᓕᕆᕝᕕᖏᑦ, ᐊᒻᒪ ᐅᑭᐅᖅᑕᖅᑐᕐᒥ ᒐᕙᒪᖃᕐᕕᐅᔪᑦ ᑎᒥᖁᑎᖏᑦ ᓄᓇᓕᑦ ᒐᕙᒪᖏᑕ ᐊᔾᔨᖏᓐᓂᒃ ᐱᔨᑦᑎᕈᑎᖃᖅᑐᓄᑦ ᓄᓇᓕᐅᔪᓄᑦ
• ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑎᒥᐅᔪᑦ
• ᐊᓪᓚᐃᑦ ᒐᕙᒪᖏᑦ, ᐱᖃᓯᐅᑎᓪᓗᒋᑦ Band ᐅᕝᕙᓗ ᐊᓪᓚᐃᑦ ᑲᑎᒪᔨᖏᑦ ᐅᕝᕙᓘᓐᓂᑦ ᒪᓕᒐᖅᑎᒍᑦ ᑎᓕᓯᒪᔭᖏᑦ ᑭᒡᒐᖅᑐᖅᑎᐅᓂᐊᕐᓗᑎᒃ.

ᐱᖃᑕᐅᔪᓐᓇᖅᑐᑦ ᑐᒃᓯᕋᐅᑎᓕᐅᕐᕕᐅᓗᑎᒃ

• ᓯᐊᕐᕆᔮᕐᕕᑦ
• ᐃᖃᐃᓕᓴᕐᕕᑦ/ᐱᓐᖑᐊᕐᕕᑦ
• ᐳᐃᔾᔪᕌᕐᕕᑦ
• ᓯᓚᒥ ᐱᓐᖑᐊᕐᒥᕕᑦ
• ᑕᓂᔅ, ᐸᓯᑲᑉᐹ, ᕙᓕᐹ ᐅᕝᕙᓗ ᐊᓯᖏᑦ ᑕᐃᒪᐃᑦᑐᓄᑦ ᐱᓐᖑᐊᕐᕕᐅᔪᑦ
• ᒥᓐᖑᐃᖅᓯᕐᕕᑦ, ᐱᓱᒡᕕᑦ ᐊᒻᒪ ᐸᐃᓯᑯᕐᕕᑦ
• ᐊᓯᖏᓪᓗ ᐊᔾᔨᒌᖏᑦᑐᓄᑦ ᐊᑐᖅᑕᐅᕙᒃᑐᑦ ᑎᒥᒧᑦ ᐃᖃᐃᓕᓴᐃᕝᕕᐅᓪᓗᑎᒃ

ᐱᖃᑕᐅᔪᓐᓇᕋᔭᕐᒥᔪᑦ ᐱᓕᕆᐊᑦ ᐅᑯᐊ:

• ᐸᕐᓇᒃᓯᒪᓗᑎᒃ ᓄᑖᕈᕆᐊᕆᓂᕐᒧᑦ ᐅᕝᕙᓘᓐᓃᑦ ᓱᕋᒃᓯᒪᔪᑦ ᓴᓇᔭᐅᓂᖏᓐᓄᑦ ᐱᓐᖑᐊᕐᕕᒐᓚᖕᓂ, ᐱᖃᓯᐅᑎᓪᓗᒋᑦ ᓄᑖᓂᒃ ᓴᓇᓂᕐᒥᒃ ᐊᖏᓕᒋᐊᕐᓗᒍ ᐅᕝᕙᓘᓐᓃᑦ ᑭᖑᕝᕕᖅᑕᐅᖁᓪᓗᒍ ᐅᓪᓗᒥ ᐱᓐᖑᐊᕐᕕᐅᑉ ᐱᖁᑎᖏᑦ ᐅᕝᕙᓘᓐᓃᑦ ᒥᑭᓗᐊᓕᕐᓂᖅᐸᓪᓘᓐᓃᑦ
• ᓴᓇᔭᐅᓂᖓ ᐱᔭᕇᖅᑕᐅᓯᒪᓗᓂ ᒫᔾᔨ 31, 2011ᒥ; ᐊᒻᒪ
• ᐱᕈᖅᐸᓪᓕᐊᔪᓐᓇᕐᓗᓂ (ᓱᕐᓗ ᐱᓕᕆᐊᖑᔪᖅ ᑲᔪᓯᔪᓐᓇᕐᓗᓂ ᐃᑲᔪᖅᑕᐅᒃᑲᓐᓂᖏᓪᓗᓂ ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᓂᑦ).

ᑐᒃᓯᕋᐅᑎᓕᐅᕐᓂᖅ

ᖃᐅᔨᒪᓂᐊᖅᐳᓯ ᑐᒃᓯᕋᐅᑎᓕᐅᕐᓂᖅ ᐱᓐᖑᐊᕐᕕᓕᕆᓂᕐᒧᑦ ᐱᖁᑎᕐᔪᐊᓕᕆᔨᒃᑯᓐᓄᑦ ᑲᓇᑕᒥᐅᑉ ᐅᑭᐅᖅᑕᖅᑐᖓᓄᑦ ᒪᑐᓂᐊᕐᒪᑦ ᔫᓂ 15th−ᖑᓕᖅᐸᑦ.   ᐱᓪᓗᒍ ᐃᓱᒪᓕᐅᖃᑦᑕᕐᒪᑕ ᐃᑲᔪᖅᑐᖅᑕᐅᖁᓪᓗᒋᑦ ᐱᓐᖑᐊᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᔨᑦ ᑲᓇᑕᒥ ᐱᓕᕆᐊᖑᔪᑦ ᐅᑭᐅᖅᑕᖅᑐᕐᒥᐅᑦ ᒐᕙᒪᖃᕐᕕᖏᓐᓂ, ᑖᓐᓇ ᖃᕆᑕᐅᔭᒃᑯᑦ ᑐᑭᓯᒋᐊᕐᕕᐅᔪᖅ ᓄᑖᕈᕆᐊᖅᑕᐅᖃᑦᑕᕐᓂᐊᖅᑐᖅ ᐊᒻᒪ ᑕᐃᒃᑯᐊ ᐊᖏᖅᑕᐅᔪᑦ ᑐᒃᓯᕋᐅᑎᓕᐅᖅᓯᒪᒧᑦ ᑐᓴᖅᑎᑕᐅᓂᐊᖅᑐᑦ ᑕᑕᑎᕆᖁᔭᐅᓗᑎᒃ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᖃᑎᒌᒍᑎᓂᒃ.