ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐃᑲᔪᖅᐳᑦ ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᓐᓂᒃ

CanNor-09-003

ᕙᐃᑦᕼᐅᐊᔅ, ᔫᑳᓐ (ᓯᑎᐱᕆ 3, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖃᖅᑎᑦᑎᓂᐊᕐᓂᕐᒥᓂᒃ ᓄᑖᒥᒃ ᐱᓕᕆᐊᓐᖑᖅᑎᑕᐅᓯᒪᔪᒥᒃ ᔫᑳᓐᒥᐅᑦ ᑮᓇᐅᔭᓕᐅᕋᓱᐊᕈᑎᖏᑦ ᐊᔾᔨᒌᓐᖏᑦᑑᑕᐅᔾᔫᒥᓕᕐᓂᐊᕐᒪᑕ, ᑮᓇᐅᔭᖃᖅᑎᑦᑎᓂᒃᑯᑦ ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᓐᓂᒃ ᑲᔪᖏᖅᓴᐅᑎᓂᒃ ᓴᓇᖃᑦᑕᕐᓂᐊᖅᑎᓪᓗᒋᑦ ᐱᔪᒥᓵᕆᔪᓂᒃ ᔫᑳᓐᒥ ᑕᕐᕆᔭᐅᓯᐅᕐᕕᒋᓗᒍ.  ᑕᒪᓐᓇ ᐱᒋᐊᖅᑎᑕᖅ ᑲᔪᓯᑎᑕᐅᔪᓐᓇᖅᓯᓚᐅᖅᑐᖅ ᐊᖅᑯᑕᐅᓪᓗᓂ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ.

“ᑕᒪᓐᓇ ᐱᓕᕆᐊᖅ ᓴᖅᑭᔮᖅᐸᒌᖅᑐᓂᒃ ᓴᓐᖏᓂᐅᔪᓂᒃ ᔫᑳᓐᒥ ᐃᑲᔪᖅᓲᑕᐅᒃᑲᓐᓂᖅᑐᖅ ᐊᒻᒪᓗ ᑲᔪᖏᖅᓴᐅᑕᐅᒋᓪᓗᓂ ᑮᓇᐅᔭᓂᒃ ᓴᒡᕙᐃᖃᑦᑕᕈᓐᓇᕐᓂᕐᒥᒃ ᔫᑳᓐᒥ ᑮᓇᐅᔭᓕᐅᕋᓱᐊᕈᑎᓄᑦ ᐊᒻᒪᓗ ᐃᖅᑲᓇᐃᔮᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ. “ᑕᒪᓐᓇ ᐊᖏᒡᓕᕙᓪᓕᐊᑐᐃᓐᓇᕐᓂᐊᖅᑐᖅ ᐊᒻᒪᓗ ᐊᔾᔨᒌᓐᖏᑦᑑᑕᐅᓕᖅᐸᓪᓕᐊᓗᑎᒃ ᔫᑳᓐᒥ ᑮᓇᐅᔭᓕᐅᕋᓱᐊᕈᑏᑦ ᐊᒻᒪᓗ ᓇᖕᒥᓂᖃᖅᑐᑦ ᓂᐅᕐᕈᑎᒋᖃᑦᑕᖅᑕᖏᓐᓂᒃ ᐊᕗᖓᐅᔨᒃᑲᓐᓂᐅᑕᐅᓂᐊᖅᖢᓂ.”

ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᑦ ᓂᐱᓕᐅᕆᓂᕐᒧᓪᓗ ᑲᑎᒪᔨᖏᑦ $635,000-ᑖᖅᑎᑕᐅᓂᐊᖅᑐᑦ ᐊᕐᕌᒎᒃ ᒪᕐᕉᒃ ᓈᓇᓱᐊᕐᓂᖏᓐᓂ ᐱᕙᓪᓕᐊᑎᑦᑎᔪᓐᓇᕐᓂᐊᕐᒪᑕ ᑕᕐᕆᔭᐅᓯᐅᖅᐸᓪᓕᐊᓂᕐᒥᓂᒃ.  ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐃᖅᑲᓇᐃᔭᖅᑎᐅᓂᐊᖅᑐᓄᑦ ᐊᒻᒪᓗ ᓂᐅᕐᕈᑕᐅᔪᒃᓴᓂᒃ ᑲᔪᖏᖅᓴᐅᑎᓕᐅᖅᑎᐅᖃᑦᑕᖅᑐᓄᑦ ᓴᓇᔪᓐᓇᕐᓂᐊᕐᒪᑕ, ᐋᖅᑭᒃᓱᐃᓗᑎᒃ ᐊᒻᒪᓗ ᓯᐊᒻᒪᒃᑎᕆᓗᑎᒃ 13-ᓂᒃ 1 ᒥᓂᑦᒥᒃ ᑕᑭᓂᓕᖕᓂᒃ ᑲᔪᖏᖅᓴᐅᑎᓂᒃ, ᔫᑳᓐᒥ ᑕᕐᕆᐅᓯᐅᕐᓂᕐᒥᒃ ᑲᔪᖏᖅᓴᐅᑎᓕᐅᖅᓯᒪᔪᓂᒃ.

ᑖᒃᑯᐊ ᑮᓇᐅᔭᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖁᑎᓂᓐᖔᖅᑐᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᕐᕌᒎᖕᓄᑦ ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᑖᒃᑯᐊ ᑮᓇᐅᔭᖃᖅᑎᑦᑎᓂᐊᖅᑐᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᑐᖅᑕᐅᔪᓐᓇᖅᑐᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐃᖅᑲᓇᐃᔮᖅᑖᕆᓯᒪᓪᓗᓂᐅᒃ ᓄᓇᑦᓯᐊᕐᒧᑦ, ᔫᑳᓐᒧᑦ ᐊᒻᒪᓗ ᓄᓇᕗᒻᒧᑦ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕙᓪᓕᐅᑎᒃᓴᓕᐊᕆᓯᒪᔭᖏᓐᓂ. 

ᐅᓪᓗᒥ ᒥᓂᔅᑕ ᔅᑐᕌᓪ ᓇᓗᓇᐃᖅᓯᓚᐅᕐᒥᔪᖅ ᑮᓇᐅᔭᓕᐅᕋᓱᐊᕈᑎᓂᒃ ᐱᓕᕆᐊᖑᓂᐊᖅᑐᓂᒃ ᐅᑭᐅᖅᑕᖅᑐᒥ ᓄᓇᕗᒻᒧᑦ ᐊᒻᒪᓗ ᓄᓇᑦᓯᐊᕐᒧᑦ.

ᐱᒋᐊᕐᓂᕕᓂᐊ - ᔫᑳᓐᒥ ᑕᕐᕆᐅᔭᐅᕐᓂᕐᒧᑦ ᓂᐱᓕᐅᕆᓂᕐᒧᓪᓗ ᑲᑎᒪᔩᑦ ᑕᕐᕆᔭᐅᓯᐅᕐᓂᖏᑦ ᑲᔪᖏᖅᓴᐅᑎᒃᓴᓂᒃ

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᖏᑦᑕ ᐊᔾᔨᖏᓐᓂᒃ ᑕᑯᔪᒪᒍᕕᑦ ᑕᑯᒋᐊᕈᓐᓇᖅᑕᐃᑦ ᐅᕘᓇ see the CanNor website.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᕆᓴᐅᔭᒃᑯᑦ ᑕᑯᒋᐊᕈᓐᓇᖅᑕᐃᑦ ᐅᕘᓇ Community Adjustment Fund.

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᒪᕆ-ᓗᐃᔅ ᐳᐃᓚᓐ
ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨᑦ ᐊᖓᔪᖅᑳᖓᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ, ᔫᑳᓐᒥᐅᓄᑦ
(867) 667-3854