ᔫᑳᓐ ᐅᐸᒍᒥᓇᕐᓂᖓ

ᔫᑳᓐ ᒐᕙᒪᒃᑯᖏᑦᑕ ᐳᓚᕋᖅᑐᓕᕆᔨᖏᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $525,000-ᓂᒃ, ᐊᖅᑯᑎᒋᔭᐅᓗᓂ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᑐᖅᑐᒃᓴᐅᑕᐅᑎᑕᐅᓂᐊᖅᖢᑎᒃ ᔫᑳᓐ ᐅᐸᒍᒥᓇᕐᓂᖓᓄᑦ, ᐊᒻᒪᓗ ᑖᓐᓇ ᐊᖅᑯᑕᐅᓗᓂ ᓂᐅᕐᕈᑎᖃᕋᓱᐊᕈᑕᐅᓂᐊᖅᑐᑦ ᑕᖅᑲᒃᑯᓄᖓᓗ ᓴᖅᑭᔮᖅᑎᑦᑎᒃᑲᓐᓂᕋᓱᖕᓂᕐᒧᑦ ᐸᕐᓇᐅᑕᐅᓂᐊᖅᖢᓂ ᑲᓇᑕᒥᐅᑕᐃᑦ ᔫᑳᓐᒧᑦ ᕿᑲᕆᐊᕈᒥᓇᖅᓯᑎᒃᑲᓐᓂᕋᓱᒡᓗᒍ, ᓲᕐᓗ ᕚᓐᑰᕙᒥᑦ, ᑐᕌᓐᑐ, ᐊᑦᒪᓐᑕᓐ ᐊᒻᒪᓗ ᑳᓪᒍᕆ.  ᑕᒪᑐᒧᖓ ᐃᓚᒋᔭᐅᖃᑕᐅᓂᐊᖅᑐᑦ ᑭᒃᑯᓐᓄᑦ ᓵᓐᖓᓪᓗᐊᕐᓂᐊᕐᒪᖔᕐᒥ ᐊᒻᒪᓗ ᐱᕙᓪᓕᐊᔪᒃᑯᑦ ᑲᔪᖏᖅᓴᐅᑎᑎᒎᖅᑎᑦᑎᖃᑦᑕᕐᓂᖅ, ᐅᐸᖃᑦᑕᕐᓗᑎᒡᓗ ᓴᓇᕕᓖᑦ ᐊᒻᒪᓗ ᓂᐅᕕᐊᒃᓴᓖᑦ ᑕᑯᒃᓴᐅᑎᑦᑎᓂᖏᓐᓄᑦ, ᐊᒻᒪᓗ ᐊᓯᖏᓐᓂᒃ ᐊᖅᑯᑎᖃᕐᓗᑎᒃ ᓴᖅᑭᔮᕐᓂᖅᓴᐅᓇᓱᖕᓂᐊᖅᑐᑦ.  ᑕᒪᓐᓇ ᐱᓕᕆᐊᖅ ᑲᒪᔾᔪᑕᐅᓗᐊᓐᖑᐊᕐᓂᐊᖅᑐᖅ ᐊᔾᔨᓐᖑᐊᓕᐅᕐᓂᒃᑯᑦ, ᑕᕐᕆᔭᒐᒃᓴᓕᐅᕐᓂᒃᑯᑦ, ᖃᕆᓴᐅᔭᒃᑰᖅᑎᑕᐅᓯᒪᔪᑦ ᐱᐅᓯᒋᐊᖅᑕᐅᓗᑎᒃ ᐊᒻᒪᓗ ᐊᓯᖏᓐᓂᒃ ᓴᓇᕐᕈᑎᓂᒃ ᐊᑐᕐᓗᑎᒃ ᑮᓇᐅᔭᖃᖅᑎᑕᐅᓯᒪᒌᖅᑐᕕᓂᕐᓂᒃ ᐅᐸᓗᖓᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᒻᒪᓗ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ.  ᑕᒪᓐᓇ ᐱᓕᕆᐊᖅ ᐃᓚᖃᕐᓂᐊᕐᒥᔪᖅ ᐅᑭᐅᒃᑯᑦ ᐊᐅᔭᒃᑯᓪᓗ ᐅᐸᒍᒥᓇᕐᓂᓕᕆᔪᓂᒃ, ᑕᒪᒃᑯᐊ ᐃᑲᔫᑕᐅᓪᓚᕆᒍᓐᓇᕐᒪᑕ ᔫᑳᓐᒥᐅᑦ ᐱᓯᓂᓯᖁᑎᖏᓐᓄᑦ ᓄᓇᖁᑖᓄᓪᓗ.

ᐃᑲᔪᖅᓱᐃᓂᖅ ᐳᓚᕋᖅᑐᓕᕆᓂᕐᒥᒃ, ᐃᑲᔪᖅᓱᐃᓂᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᖏᓐᓂᒃ

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐋᖅᑭᒃᑕᐅᓯᒪᕗᑦ ᓄᓇᓕᖕᓄᑦ ᐃᑲᔪᖅᑐᒃᓴᐅᑕᐅᓪᓗᑎᒃ, ᐱᓗᐊᕐᓗᒍ ᑕᐃᒃᑯᐊ ᓄᓇᓖᑦ ᓄᓇᒥᐅᑕᓂᒃ ᑐᓐᖓᕕᓕᖕᓂᒃ ᐱᓕᕆᕝᕕᓖᑦ ᐊᒻᒪᓗ ᐊᑐᖅᑐᒃᓴᓂᒃ ᓴᓇᕕᓖᑦ, ᐃᖅᑲᓇᐃᔮᑦ ᓴᖅᑭᔮᖅᑎᑕᐅᖏᓐᓇᕈᓐᓇᕐᓂᐊᕐᒪᑕ ᐊᒻᒪᓗ ᐋᖅᑭᒋᐊᕈᓐᓇᕐᓂᐊᕐᒪᑕ ᐋᖅᑭᒃᓱᒃᑲᓐᓂᕐᓗᓂᔾᔪᒡᓗ ᑮᓇᐅᔭᓕᐅᕈᑎᓂᑦ.  ᐊᒥᓱᑦ ᐱᓕᕆᐊᑦ ᑮᓇᐅᔭᖃᖅᑎᑕᐅᔪᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖅᑎᒍᑦ ᑲᑐᔾᔨᖃᑎᒌᖕᓂᕐᒥᒃ ᐋᖅᑭᒃᓱᐃᓯᒪᕗᑦ ᓴᖅᑭᔮᕇᖅᑐᓂᒃ, ᐊᒻᒪᓗ ᐊᕗᖓᐅᔨᓯᒪᓂᖅᓴᓂᒃ ᓄᓇᒥᐅᑕᓄᑦ ᑐᕌᖓᔪᓂᒃ ᐊᒻᒪᓗ/ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕈᑎᑎᒍᑦ ᐃᑲᔫᑎᓂᒃ ᓴᖅᑭᔮᖅᑎᑦᑎᔾᔪᑕᐅᓪᓗᑎᒃ.

ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᐊᑐᐃᓐᓇᕈᐃᔨᐅᕗᑦ $1 ᐱᓕᐊᓂᒃ ᐊᕐᕌᒎᖕᓄᑦ ᒪᕐᕉᖕᓄᑦ, ᐊᑐᖅᖢᒍ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᑐᖅᑕᐅᔭᕆᐊᓖᑦ ᒪᐅᖓᑦᑎᐊᖅ ᑮᓇᐅᔭᓕᐅᕋᓱᐊᕐᓂᒃᑯᑦ ᑭᓐᖒᒪᔭᖃᓗᐊᖅᑐᓄᑦ ᑲᓇᑕᒥᐅᑦ ᓄᓇᓕᖁᑎᖏᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᓴᖅᑭᑕᐅᓯᒪᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᓯᖏᓐᓄᑦ ᑲᓇᑕᐅᑉ ᒐᕙᒪᒃᑯᖏᓐᓂ ᑮᓇᐅᔭᓕᐅᕋᓱᐊᕐᓂᕐᒥᒃ ᐱᔭᒃᓴᖅᑖᖅᑎᑕᐅᓯᒪᔪᓂ ᑲᓇᑕᐅᑉ ᐊᕕᒃᑐᖅᓯᒪᔪᖁᑎᖏᓐᓂ.  ᑖᒃᑯᐊ ᑎᒥᓐᖑᖅᑎᑕᐅᓯᒪᔪᑦ ᐱᑎᑕᐅᓚᐅᖅᑐᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐊᑐᖅᑐᒃᓴᓂᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᒥᒃᓵᓅᖓᔪᓂᒃ, ᖃᕆᓴᐅᔭᒃᑰᖅᑎᑕᖅ ᐅᓇ ᑕᑯᒋᐊᕈᓐᓇᖅᑕᐃᑦ http://north.gc.ca/pr/caf-eng.asp.