ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᑮᓇᐅᔭᖃᖅᑎᑦᑎᕗᑦ ᓄᓇᑦᓯᐊᕐᒥ ᐊᖅᑯᑎᕐᔪᐊᓕᐅᕈᒪᓂᕐᒧᑦ ᖃᐅᔨᓴᓂᕐᒥᒃ

ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᓕᖅᑐᑦ ᑮᓇᐅᔭᓂᒃ ᑐᒃᑑᔭᖅᑑᑉ ᕼᐋᒻᓚᒃᑯᓐᓄᐊᕐᓂᐊᖅᑐᓂᒃ, ᐃᖅᑲᓇᐃᔭᖃᑎᖃᕐᓂᐊᖅᖢᑎᒡᓗ ᐃᓅᕕᖕᒥᐅᓂᒃ, $975,000-ᓂᒃ ᐊᑐᕐᓗᑎᒃ ᖃᐅᔨᓴᐃᓂᐊᖅᑐᑦ ᐊᖅᑯᑎᕐᔪᐊᓕᐅᕈᓐᓇᕐᓂᐊᕐᒪᖔᕐᒥ ᑐᒃᑑᔭᖅᑑᑉ ᐊᒻᒪᓗ ᐃᓅᕕᐅᑉ ᐊᑯᓐᓂᐊᒎᖅᑐᒃᓴᒥᒃ.

140 ᑭᓚᒦᑕᓂᒃ ᑕᑭᓂᖃᕐᓂᐊᖅᑐᖅ ᐊᖅᑯᓯᐅᖅᑕᐅᔪᒪᔪᖅ ᐱᑐᒃᓯᓂᐊᖅᖢᓂᓗ ᑐᒃᑑᔭᖅᑑᕐᒥᒃ ᑕᒻᔅᑐ ᐊᖅᑯᑎᕐᔪᐊᖓᓄᑦ ᐃᓅᕕᖕᒧᑦ, ᐊᕐᕌᒎᓪᓗ ᐃᓗᐊᓂ ᒪᑐᓚᐅᖅᓯᒪᓐᖏᓪᓗᓂ ᐊᑐᖅᑕᐅᖃᑦᑕᕈᓐᓇᕐᓂᐊᖅᖢᓂ ᑲᓇᑕᓕᒫᕐᒧᑦ ᐊᖅᑯᑎᖃᖃᓯᐅᑎᓕᕐᓗᑎᒃ.

ᐊᕐᕌᒍᓕᒫᖅ ᐊᑐᖅᑕᐅᔪᓐᓇᖅᑐᖅ ᐊᖅᑯᑎᕐᔪᐊᖅ ᓄᓇᑦᓯᐊᕐᒥ ᑲᓇᑕᒥ ᐱᑐᐃᓂᐊᖅᑐᖅ ᐊᖅᑯᑎᓂᒃ ᐱᑐᒃᓯᔪᓂᒃ ᓂᒋᐊᓂᑦ ᐅᐊᖕᓇᖓᓄᑦ.  ᐊᖅᑯᑎᕐᔪᐊᖅ ᑕᒻᔅᑑᓂᕋᖅᑕᐅᔪᖅ, ᐱᒋᐊᖅᓯᒪᕗᖅ ᑖᓴᓐ ᓯᑎᒥ, ᔫᑳᓐᒥ, ᐊᒻᒪᓗ ᐃᓅᕕᖕᒧᑦ ᑎᑭᓯᒪᓪᓗᓂ, ᓄᓇᑦᓯᐊᕐᒥ, 140 ᑭᓚᒦᑕᒥᒃ ᐃᓄᖅᓯᓯᒫᕐᔪᒃᖢᓂ ᑲᓇᑕᐅᑉ ᐅᐊᓕᓂᖓᑕ ᑕᕆᐅᖓᓂᒃ.  ᐊᖅᑯᑦ ᐃᓅᕕᖕᒥᒃ ᐱᑐᒃᓯᓂᐊᖅᑐᖅ ᑐᒃᑑᔭᖅᑑᑉ ᕼᐋᒻᓚᖓᓄᑦ, ᑕᕝᕙᓂᓗ ᐃᑎᔪᒥᒃ ᑐᓚᒃᑕᕐᕕᒃᑕᖃᖅᖢᓂ.  ᑐᒃᑑᔭᖅᑑᑉ ᑐᓚᒃᑕᕐᕕᖓ 30 ᒦᑕᓂᒃ ᐃᑎᓂᖃᖅᐳᖅ ᐊᒻᒪᓗ ᑖᓐᓇᑐᐊᑦᑎᐊᖑᓪᓗᓂ ᓄᓇᓕᐅᔪᖅ ᐅᐊᓕᓂᐅᑉ ᑕᕆᐅᖓᓂ ᑐᓚᒃᑕᕐᕕᓕᒃ.  ᐱᒻᒪᕆᐅᓂᖓ ᐱᕙᓪᓕᐊᑐᐃᓐᓇᖅᑐᖅ ᑮᓇᐅᔭᓕᐅᕋᓱᐊᕈᑏᑦ ᐅᓄᖅᓯᕙᓪᓕᐊᑐᐃᓐᓇᖅᑎᓪᓗᒋᑦ, ᐊᒻᒪᓗ ᐅᑭᐅᖅᑕᖅᑐᒥ ᐅᒥᐊᕐᔪᐊᓄᑦ ᐊᖅᑯᑎᒃᓴᐃᑦ ᓴᖅᑭᑉᐸᓪᓕᐊᑐᐃᓐᓇᖅᑎᓪᓗᒋᑦ.

ᐱᓕᕆᐊᓄᑦ ᐊᑐᖅᑐᒃᓴᑦ ᑮᓇᐅᔭᑦ ᐅᑯᓄᖓ ᐊᑐᖅᑕᐅᓂᐊᖅᑐᑦ:

• ᐱᓕᕆᐊᑉ ᐊᐅᓚᑕᐅᓂᖓ;
• ᐅᐸᓗᖓᐃᔭᐃᓂᖅ ᐱᓕᕆᐊᑉ ᖃᓄᐃᑦᑑᓂᐊᕐᓂᖓ ᐱᓕᕆᐊᖑᑎᓪᓗᒍ ᐊᒻᒪᓗ ᓯᕗᓪᓕᖅᐹᖅᓯᐅᑏᑦ ᐊᕙᑎᒥᒃ ᐅᓂᒃᑳᓕᐊᖑᓂᐊᖅᑐᑦ;
• ᐊᕙᑎ ᖃᐅᔨᓴᖅᑕᐅᓂᖓ;
• ᓄᓇᓖᑦ/ᐊᒃᑐᖅᑕᐅᓂᐊᖅᑐᑦ ᑐᑭᓯᓇᓱᒡᕕᐅᓂᖏᑦ; ᐊᒻᒪᓗ
• ᓯᕗᓪᓕᖅᐹᖅᓯᐅᑏᑦ ᐊᖅᑯᑦ ᓇᐅᒃᑰᕐᓂᐊᕐᓂᖓᓄᑦ ᖃᐅᔨᓴᐅᑏᑦ ᐊᒻᒪᓗ ᐅᓂᒃᑳᑦ ᒫᓐᓇ ᐃᖅᑲᓇᐃᔮᕆᔭᐅᔪᓅᖓᔪᑦ, ᖃᖓᑕᓲᒃᑯᑦ ᐊᔾᔨᓕᐊᕕᓃᑦ/ᓄᓇᓐᖑᐊᑦ ᐊᒻᒪᓗ ᑲᑎᖅᓱᖅᑕᕕᓃᑦ ᐅᖃᓕᒫᑦ.

ᖃᐅᔨᓵᖅ ᐱᔭᕇᖅᑕᐅᒃᐸᑦ, ᑭᖑᓂᑦᑎᐊᖓᓂ ᐸᕐᓇᐃᕙᓪᓕᐊᔭᕆᐊᖃᕐᓂᐊᖅᑐᒍᑦ ᒪᓕᒐᖅᑎᒍᑦ ᐊᑐᖅᑕᐅᔭᕆᐊᓕᖕᓂᒃ ᐊᒻᒪᓗ ᐃᓗᓕᖃᐅᖅᑐᓂᒃ ᖃᓄᐃᓕᖓᓂᕆᓂᐊᖅᑕᑦᑎᓐᓄᑦ ᐅᓂᒃᑳᖅᓯᒪᔪᓂᒃ.  ᑕᒪᒃᑯᐊ ᐅᐸᓗᖓᐃᔭᐅᑏᑦ ᐃᑲᔫᑕᐅᒃᑲᓐᓂᕐᓂᐊᖅᑐᑦ ᑕᒪᒃᑮᖕᓄᑦ ᒪᐅᖓᑦᑎᐊᖅ ᐃᖅᑲᓇᐃᔮᖑᑲᐃᓐᓇᕐᓂᐊᖅᑐᓄᑦ ᐊᖅᑯᓯᐅᖅᑎᓪᓗᒋᑦ ᐊᒻᒪᓗ ᐊᕗᖓᐅᔨᓯᒪᔪᓄᑦ ᐱᕕᑖᖅᑎᑦᑎᓂᐊᖅᖢᓂ ᐊᖅᑯᑦ ᐊᐅᓚᑕᐅᑎᓪᓗᒍ ᐊᒻᒪᓗ ᒪᑭᒪᑎᑕᐅᑎᓪᓗᒍ.  ᐃᖅᑲᓇᐃᔮᑦ ᓴᖅᑭᑦᑐᑦ ᑕᒪᔾᔭᐅᒐᓗᐊᖅᑎᓪᓗᒋᑦ, ᓂᕆᐅᒃᑐᒍᑦ ᑖᓐᓇ ᐊᖅᑯᑦ ᓴᓐᖏᒃᑎᑉᐹᓪᓕᐅᑕᐅᓂᐊᕐᓂᖓᓂᒃ ᓄᓇᓖᑦ ᐃᖅᑲᓇᐃᔭᖃᑎᒌᖕᓂᖏᑦᑎᒍᑦ ᐊᒻᒪᓗ ᑮᓇᐅᔭᓂᒃ ᓴᒡᕙᐃᔪᒃᓴᑦ ᓄᓇᒥᐅᑕᓄᑦ ᐅᓄᖅᓯᒋᐊᒃᑲᓐᓂᕐᓂᐊᕋᓱᒋᓪᓗᑎᒃᑯᑦ.

ᑐᒃᑑᔭᖅᑑᕐᒥᑦ ᐃᓅᕕᖕᒧᑦ ᐊᖅᑯᑎᕐᔪᐊᑉ ᓴᓇᔭᐅᓂᖓ ᐃᑲᔪᖅᓱᖅᑕᐅᔪᖅ ᑲᓇᑕᐅᑉ, ᐅᑭᐅᖅᑕᖅᑑᑉ, ᓄᓇᓖᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᒐᕙᒪᖏᓐᓄᑦ.  ᑖᒃᑯᐊ ᐃᓚᐅᖏᓐᓇᕆᐊᖃᕐᓂᐊᖅᑐᑦ ᑕᒪᓐᓇ ᐱᓕᕆᐊᖑᔪᖅ ᐱᔭᕇᖅᑕᐅᔪᓐᓇᕐᓂᐊᕐᒪᑦ.  ᑕᐃᒪᐃᑦᑐᑦ ᐱᖁᑎᕐᔪᐊᑦ ᑐᓗᖅᑕᐅᑎᖃᕈᓐᓃᖅᑎᑦᑎᓂᐊᖅᑐᑦ ᑮᓇᐅᔭᓕᐅᕋᓱᐊᕈᑎᖃᕈᓐᓇᕐᓂᐊᕈᑦᑕ ᒪᑭᒪᔪᓐᓇᖅᑐᓂᒃ ᐊᒃᖢᔪᓐᓃᖅᐹᓪᓕᖅᑎᒃᑲᓐᓂᕋᓱᒡᓗᑎᒃᑯᓪᓗ, ᐊᒻᒪᓗ ᐊᑐᐃᓐᓇᐅᓂᖅᓴᐅᓕᕐᓂᐊᖅᖢᑎᒃ ᓄᓇᓖᑦ ᐊᒻᒪᓗ ᓄᓇᒥᐅᑕᐃᑦ ᑮᓇᐅᔭᐅᓕᕈᑕᐅᔪᓐᓇᖅᑐᑦ.

ᑖᒃᑯᐊ ᑮᓇᐅᔭᑦ ᖃᐅᔨᓴᐃᓂᕐᒧᑦ ᐊᑐᖅᑐᒃᓴᑦ ᐊᑐᐃᓐᓇᕈᐃᓯᒪᕗᑦ ᓄᓇᓕᖕᓂ ᐋᖅᑭᒋᐊᕆᐊᓂᕐᒧᑦ ᑮᓇᐅᔭᓄᑦ,  ᑖᒃᑯᐊ ᐱᓕᕆᐊᓐᖑᖅᑎᑕᐅᓯᒪᔪᑦ ᐊᑐᐃᓐᓇᕈᖅᑎᑕᐅᓯᒪᖕᒪᑕ ᐱᖓᓱᓄᑦ ᒐᕙᒪᖃᕐᕕᓕᖕᓄᑦ ᐅᑭᐅᖅᑕᖅᑐᒥ ᓴᖅᑭᑕᐅᓵᖅᑐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ $1 ᐱᓕᐊᓐᓂᒃ ᐊᑐᐃᓐᓇᕈᐃᖃᑦᑕᖅᐳᑦ ᐊᕐᕌᒎᖕᓄᑦ ᒪᕐᕉᖕᓄᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖅᑎᒍᑦ ᐃᖅᑲᓇᐃᔮᓂᒃ ᓴᖅᑭᑦᑐᖃᖅᐸᓪᓕᐊᓂᐊᕐᒪᑦ ᐊᒻᒪᓗ ᑮᓇᐅᔭᓕᐅᕈᑎᒃᓴᓂᒃ ᒥᑭᓐᓂᖅᓴᐅᔪᓂ ᐅᐸᒐᕐᓂᓐᖏᓐᓂᖅᓴᐅᔪᓂ ᓄᓇᓕᖕᓂ.  ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕙᓪᓕᐊᑎᑦᑎᓂᖅ ᑐᓐᖓᕕᒋᔭᐅᖃᑕᐅᓪᓚᕆᒃᐳᖅ ᑲᓇᑕᒥ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᒃᓴᓕᐊᕆᓯᒪᔭᖏᓐᓄᑦ.