ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᑮᓇᐅᔭᖃᖅᑎᑦᑎᔪᒪᕗᑦ ᐊᖅᑯᓯᐅᖅᑕᐅᔪᒪᔪᒥᒃ ᑐᒃᑑᔭᖅᑑᑉ ᐊᒻᒪᓗ ᐃᓅᕕᐅᑉ ᐊᑯᓐᓂᖓᒎᖅᑐᒃᓴᒥᒃ

ᓈᓴᐅᑖ CanNor-09-001

ᔭᓗᓇᐃᕝ, ᓄᓇᑦᓯᐊᖅ - (ᓯᑎᐱᕆ 3, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ $975,000-ᓂᒃ ᑮᓇᐅᔭᖃᖅᑎᑦᑎᓂᐊᕐᓂᕋᖅᖢᓂ ᐸᕐᓈᕆᔭᐅᔪᓐᓇᕐᓂᐊᕐᒪᑦ 140 ᑭᓚᒦᑕᒥᒃ ᑕᑭᓂᓕᒃ ᐊᖅᑯᑦ ᑐᒃᑑᔭᖅᑑᑉ ᐊᒻᒪᓗ ᐃᓅᕕᐅᑉ ᐊᑯᓐᓂᖓᒎᕐᓂᐊᖅᑐᖅ ᓄᓇᑦᓯᐊᕐᒥ.

"ᒐᕙᒪᕗᑦ ᐃᓕᓴᖅᓯᓯᒪᕗᑦ ᐊᖅᑯᑎᕐᔪᐊᖅᑕᖃᕆᐊᖃᕐᓂᖓ ᓯᕗᓪᓕᐅᔾᔭᐅᓯᒪᔭᕆᐊᖃᕐᓂᖓᓂᒃ ᓄᓇᑦᓯᐊᕐᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑐᒃᑑᔭᖅᑑᕐᒥᑦ ᐃᓅᕕᖕᒧᑦ ᑎᑭᓪᓗᒍ ᐊᖅᑯᑎᕐᔪᐊᓕᐅᕐᓂᖅ ᐱᒋᐊᕈᑎᑦᑎᐊᕙᐅᔪᖅ ᐊᒻᒪᓗ ᑲᓇᑕᒥᐅᓄᑦ ᐊᑐᖅᑕᐅᖃᑦᑕᕈᓐᓇᖅᖢᓂ ᐅᑭᐅᖅᑕᖅᑐᓕᐊᕈᒪᔪᓄᑦ.  ᑕᐃᒪᐃᓐᓂᖓᓄᑦ ᐅᐱᑉᐳᒍᑦ ᑕᒪᓐᓇ ᖃᔅᓯᑐᕐᓂᐊᕐᒪᖔᖓᓂᒃ ᖃᐅᔨᓴᐃᓂᒃᑯᑦ ᐃᑲᔪᕈᓐᓇᕋᑦᑎᒍᑦ.”

ᑕᒪᓐᓇ ᑮᓇᐅᔭᖃᖅᑎᑕᐅᔪᖅ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖅᑎᒍᑦ, ᐊᒻᒪᓗ ᑐᒃᑑᔭᖅᑐᕐᒥᐅᑦ ᐃᓅᕕᖕᒥᐅᓪᓗ ᓄᓇᓕᖏᓐᓄᑦ ᐃᑲᔫᑕᐅᓂᐊᖅᖢᓂ ᖃᐅᔨᓴᐃᔪᓐᓇᕐᓂᐊᕐᒪᑕ ᒪᑲᓐᔨ ᕚᓕᐅᑉ ᐊᖅᑯᑎᕐᔪᐊᖓᓂ ᐱᒋᐊᕐᓗᒍ ᐱᑐᒃᑕᐅᖃᓯᐅᔾᔭᐅᔪᓐᓇᕐᓂᐊᕐᒪᑎᒃ ᑖᒃᑯᐊᒃ ᒪᕐᕉᒃ ᓄᓇᓖᒃ ᑲᓇᑕᒥᐅᖑᖃᑎᑦᑎᓐᓄᑦ.  ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐊᕙᑎᒥᒃ ᖃᐅᔨᓴᐃᓂᕐᒧᑦ, ᐊᒃᑐᖅᑕᐅᓂᐊᖅᑐᑦ ᑐᑭᓯᕕᐅᓇᓱᒡᓗᑎᒃ ᐊᒻᒪᓗ ᓯᕗᓪᓕᖅᐹᖅᓯᐅᑎᓂᒃ ᐊᖅᑯᑦ ᓇᐅᒃᑰᕐᓂᐊᕐᒪᖔᖅ ᖃᐅᔨᓴᐃᔾᔪᑕᐅᓗᑎᒃ.  ᓯᕗᓂᒃᓴᑦᑎᓐᓂ ᓴᓇᔪᖃᕐᓂᐊᖅᐸᑦ ᐊᒻᒪᓗ ᐊᖅᑯᓯᕆᓂᖅ ᐃᖅᑲᓇᐃᔮᓂᒃ ᓴᖅᑭᑦᑎᓂᐊᖅᑐᖅ ᒪᐅᖓᑦᑎᐊᖅ ᐊᒻᒪᓗ ᐊᕗᖓᐅᔨᓯᒪᔪᒃᑯᑦ.

"ᑕᒪᓐᓇ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᖃᖅᑎᑦᑎᓂᖓ ᑐᓐᖓᓱᒃᑎᑦᑎᐊᖅᑕᕗᑦ.  ᓇᓗᓇᐃᖅᓯᕗᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐃᑲᔪᕈᒪᑦᑎᐊᕐᓂᖏᓐᓂᒃ ᐅᑭᐅᖅᑕᖅᑐᒥᒃ,” ᑕᐃᒪᓐᓇ ᐅᖃᓚᐅᖅᑐᖅ ᓄᓇᑦᓯᐊᑉ ᓯᕗᓕᖅᑎᖓ ᕗᓗᐃᑦ ᕉᓚᓐ.  “ᑕᒪᓐᓇ ᓇᓗᓇᐃᖅᑕᐅᑎᓪᓗᒍ, ᓇᓗᓇᕈᓐᓃᖅᐳᖅ ᐃᑲᔫᑎᓂᒃ ᓴᖅᑭᑦᑎᔪᓐᓇᕐᓂᖏᑦ ᑲᓇᑕᐅᑉ, ᐅᑭᐅᖅᑕᖅᑐᑉ, ᓄᓇᓖᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᒐᕙᒪᖏᑦ ᑲᑐᔾᔨᔪᓐᓇᕐᓂᖏᓐᓂᒃ, ᓇᓗᓇᐃᔭᐃᑎᓪᓗᒋᑦ ᐱᓇᓱᐊᖅᑎᓪᓗᒋᓪᓗ ᐅᑭᐅᖅᑕᖅᑐᒥ ᑭᓱᑦ ᓯᕗᓪᓕᐅᔾᔭᐅᔭᕆᐊᖃᕐᓂᖏᑦ.  ᐅᓪᓗᒥ ᓇᓗᓇᐃᖅᓯᓂᐅᔪᖅ ᐃᓕᓴᖅᓯᕗᖅ ᖃᓄᖅ ᐅᑭᐅᖅᑕᖅᑐᖅ ᓇᖕᒥᓂᕆᔭᐅᓕᕈᓐᓇᕐᒪᖔᖅ ᐊᒻᒪᓗ ᐊᖏᕐᕋᖅᓯᒪᔪᑦ ᖃᓄᖅ ᐃᑲᔪᖅᑕᐅᒃᑲᓐᓂᕈᓐᓇᕐᓂᖏᑦ - ᐱᖁᑎᕐᔪᐊᓕᕆᓂᖅ - ᑮᓇᐅᔭᓕᐅᕋᓱᐊᕈᓯᕗᑦ - ᐊᒻᒪᓗ ᐃᓅᓯᖃᑦᑎᐊᕐᓂᒃᑯᑦ."  

"ᓄᓇᓕᑦᑎᓐᓄᑦ ᑕᒪᓐᓇ ᐃᓱᒪᒋᔭᐅᖃᑦᑕᖅᓯᒪᕗᖅ ᐅᖃᓪᓚᐅᑕᐅᓪᓗᓂ ᐊᕐᕌᒍᓄᑦ 30-ᓄᑦ, ᑐᒃᑑᔭᖅᑑᖅ ᐊᖅᑯᑎᑖᕐᓂᖓ ᐃᓅᕕᖕᒧᑦ - ᐅᕙᒍᓪᓗ ᐊᖅᑯᑎᑖᕆᓪᓗᑕ ᑲᓇᑕᒥᐅᑕᐅᖃᑎᑦᑎᓐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒨᕕᓐ ᒍᕉᕙᓐ, ᒪᐃᔭᒋᔭᐅᔪᖅ ᑐᒃᑑᔭᖅᑑᑉ ᕼᐋᒻᓚᒃᑯᖏᓐᓄᑦ, ᐅᖃᕆᓪᓗᓂ ᐊᑯᓂᐅᓕᖅᑐᖅ ᐊᖅᑯᑎᖃᕐᓂᖅ ᖃᓪᓗᓈᓄᑦ ᐃᓱᒪᒋᔭᐅᖃᑦᑕᖅᓯᒪᓕᕐᒪᑦ ᐱᓐᖑᖅᐸᓪᓕᐊᓕᕐᓂᖓ ᐃᓱᒪᒋᕙᓚᐅᖅᑕᑦᑕ ᐋᖅᑭᐸᓪᓕᐊᓯᕗᖅ."

ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓄᑦ ᐃᓚᒋᔭᐅᓪᓗᓂ, ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᒪᕐᕉᖕᓄᑦ ᐊᕐᕌᒎᖕᓄᑦ ᐋᖅᑭᒃᑕᐅᓯᒪᕗᑦ $1 ᐱᓕᐊᑦ ᑲᓇᑕᓕᒫᒧᑦ ᑐᕌᖓᓪᓗᑎᒃ, ᑮᓇᐅᔭᓕᐅᕋᓱᐊᕈᑎᓄᓪᓗ ᐱᒋᐊᕈᑕᐅᓪᓗᓂ ᓄᓇᓕᖕᓂ ᐃᖅᑲᓇᐃᔮᓂᒃ ᓴᖅᑭᕕᐅᖃᑦᑕᕈᓐᓇᕐᓂᐊᕐᒪᑕ ᐊᒃᑐᖅᑕᐅᓯᒪᓗᐊᖅᑐᑦ ᓄᓇᕐᔪᐊᕐᒥ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᑮᓇᐅᔭᓂᒃ ᐊᑐᐃᓐᓇᕈᐃᓂᐊᖅᑐᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᑎᑕᐅᖃᑕᐅᕗᑦ, ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐃᖅᑲᓇᐃᔮᖓᓄᑦ ᐃᓚᒋᔭᐅᖃᑕᐅᓪᓗᓂ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ. ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᑦ. 

ᐅᓪᓗᒥ ᒥᓂᔅᑕ ᔅᑐᕌᓪ ᓇᓗᓇᐃᖅᓯᖅᑲᐅᖕᒥᔪᖅ ᑮᓇᐅᔭᖃᖅᑎᑕᐅᒃᑲᓐᓂᕐᓂᐊᕐᓂᕋᖅᖢᓂᒋᑦ ᑮᓇᐅᔭᓕᐅᕋᓱᐊᕈᑎᒃᓴᑦ ᐅᑭᐅᖅᑕᖅᑐᒥ ᔫᑳᓐᒧᑦ ᐊᒻᒪᓗ ᓄᓇᕗᒻᒧᑦ, ᐊᖅᑯᑕᐅᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ.

Backgrounder - ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᑮᓇᐅᔭᖃᖅᑎᑦᑎᕗᑦ ᓄᓇᑦᓯᐊᕐᒥ ᐊᖅᑯᑎᕐᔪᐊᓕᐅᕈᒪᓂᕐᒧᑦ ᖃᐅᔨᓴᓂᕐᒥᒃ

 

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ, ᓄᓇᑦᓯᐊᕐᒧᑦ
(867) 669-2580