ᔭᓗᓇᐃᕝ – ᐃᓂᑖᖑᕗᖅ ᑲᓇᑕᐅᑉ ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᒃᑖᓵᖓᓐᓄᑦ

CanNor-09-005

ᔭᓗᓇᐃᕝ, ᓄᓇᑦᓯᐊᖅ (ᓯᑎᐱᕆ 11, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ ᔭᓗᓇᐃᕝᒦᓐᓂᐊᕐᓂᖓᓂᒃ, ᓄᓇᑦᓯᐊᕐᒥ.

“ᑖᓐᓇ ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ ᐱᔭᒃᓴᖅᑖᖅᑎᑕᐅᓂᐊᖅᑐᖅ ᑐᑭᒧᐊᒃᑎᒋᔨᐅᓗᓂ ᐅᑭᐅᖅᑕᖅᑐᒥ ᐱᓕᕆᐊᖑᔪᓄᑦ ᐊᒻᒪᓗ ᐊᑕᐅᓯᕐᒧᑦ ᖃᐅᔨᒋᐊᕐᕕᖃᓕᕐᓗᑎᒃ ᑕᐃᒃᑯᐊ ᐱᔨᑦᑎᕈᑎᖃᑦᑕᖅᑕᕗᑦ.  ᔭᓗᓇᐃᕝᒥ ᑎᑎᕋᕐᕕᒃ ᑐᑦᑕᕐᕕᖃᓕᖅᑎᓪᓗᒍ, ᐊᖏᔫᑎᓂᒃ ᓄᓇᒥᓐᖔᖅᑐᓂᒃ ᐱᓕᕆᐊᓂᒃ ᑐᑭᒧᐊᒃᑎᑦᑎᔨᐅᔪᓐᓇᕐᓂᐊᖅᑐᖅ ᐅᑭᐅᖅᑕᖅᑐᒦᑦᑐᓕᒫᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ ᐊᒃᓱᐊᓗᒃ ᐃᑲᔫᑎᖃᕐᓂᐊᖅᑐᖅ ᖃᓄᐃᓕᐅᖃᑦᑕᕐᓂᑦᑎᓐᓂ ᐱᓕᕆᐊᓄᑦ ᐅᑭᐅᖅᑕᖅᑐᒥ.”

ᐃᓚᒋᔭᐅᖃᑕᐅᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ ᑐᑭᒧᐊᒃᑎᒋᔭᐅᓂᐊᖅᑐᖅ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᕝᕕᖏᑦᑎᒍᑦ ᐱᓕᕆᐊᖑᔪᓂᒃ ᓄᓇᒥᐅᑕᓕᕆᔪᓂᒃ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓂ.  ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖏᑦ ᐊᑐᓂ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓂ ᑐᑭᒧᐊᒃᑎᑦᑎᔨᐅᓂᐊᖅᑐᑦ ᐊᕕᒃᑐᖅᓯᒪᔪᓂ ᐱᓕᕆᐊᖑᔪᓂᒃ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑕᖅᑳᓐᖓᑦ ᑐᑭᓯᓇᓱᖕᓂᕆᖃᑦᑕᖅᑕᖏᓐᓂᒃ ᐱᓕᕆᐊᖃᖃᑦᑕᕐᓗᑎᒃ.

ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ ᐊᓯᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᕝᕕᖏᓐᓂᒃ ᑎᒥᓐᖑᖅᑎᓯᒪᔭᖏᓐᓂᒡᓗ ᐃᖅᑲᓇᐃᔭᖃᑎᖃᕐᓂᐊᖅᑐᖅ ᐋᖅᑭᒃᓱᐃᖃᑎᒋᓗᓂᒋᑦ ᐱᓕᕆᐊᓄᑦ ᐊᖏᕈᑎᓂᒃ, ᐃᑲᔪᕐᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᖁᑎᖏᓐᓂᒃ ᓄᓇᓕᖁᑎᖏᓐᓂᒡᓗ ᑕᒪᓐᓇ ᐊᑐᖅᑕᐅᑎᓪᓗᒍ, ᑐᓴᐅᒪᑎᑦᑎᖃᑦᑕᕐᓗᑎᒡᓗ ᑕᖅᑲᒃᑯᓂᖓ ᖃᓄᐃᓕᖓᓕᕐᒪᖔᖏᑦ ᐱᓕᕆᐊᑦ, ᐊᒻᒪᓗ ᐃᑲᔪᖃᑦᑕᕐᓗᑎᒃ ᐊᕙᑎ ᖃᐅᔨᓴᖅᑕᐅᑎᓪᓗᒍ, ᐱᔪᓐᓇᐅᑎᓪᓗ ᐱᔭᐅᓇᓱᒃᑎᓪᓗᒋᑦ ᑲᔪᓯᑦᑎᐊᕋᓗᐊᕐᒪᖔᖏᑦ ᐅᑭᐅᖅᑕᖅᑐᒦᑦᑐᑦ ᐱᔾᔪᑎᒋᓪᓗᒋᑦ.  Canada’s Economic Action Plan (ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ) ᐊᑐᐃᓐᓇᕈᐃᓚᐅᖅᐳᑦ $50 ᒥᓕᐊᓐᓂᒃ ᑕᓪᓕᒪᑦ ᐊᕐᕌᒍᑦ ᐃᓗᐊᓂ, ᓴᖅᑭᑦᑎᔪᓐᓇᕐᓂᐊᕋᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᒃ ᓄᑖᓂᒃ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᒃᑎᒋᔭᐅᓂᐊᕐᓗᑎᒃ ᓴᖅᑭᑎᑦᑎᔨᐅᓗᑎᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᑎᑕᖏᓐᓂᒃ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ. 

ᐅᓪᓗᒥ ᑕᒪᓐᓇ ᓇᓗᓇᐃᖅᑕᐅᑎᓪᓗᒍ ᐃᑲᔪᖅᓱᐃᔾᔪᑕᐅᕗᖅ ᒐᕙᒪᐃᑦ ᑲᑎᓐᖓᑎᑦᑎᔪᒪᓂᖏᓐᓂᒃ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓂᒃ ᓵᓐᖓᓪᓗᐊᑕᖅᖢᑎᒃ ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓ, ᓴᐳᒻᒥᐅᓯᖅᑕᐅᓯᒪᓪᓗᑎᒃ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᐃᑦ, ᓴᖅᑭᔮᖅᑎᑦᑎᒃᑲᓐᓂᕐᓂᖅ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ, ᐊᒻᒪᓗ ᐱᐅᓯᒋᐊᖅᑎᑦᑎᓗᑎᒃ ᐅᑭᐅᖅᑕᖅᑐᕐᓗ ᐊᐅᓚᑕᐅᓂᖓ ᐃᓄᖏᓐᓄᑦ ᑐᓐᓂᖅᑯᑕᐅᕙᓪᓕᐊᓂᖓ.

 

ᐱᒋᐊᕐᓂᕕᓂᐊ - ᐅᑭᐅᖅᑕᖅᑐᒥ ᐱᓕᕆᐊᓄᑦ ᒥᐊᓂᖅᓯᔨᐅᑉ ᑎᑎᕋᕐᕕᖓ

 

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᓄᓇᑦᓯᐊᕐᒥ
(867) 669-2580