ᓄᓇᕗᒻᒥ ᐃᖃᓗᓕᕆᓂᒃᑯᑦ ᑮᓇᐅᔭᓕᐅᕋᓱᐊᖅᑏᑦ ᑮᓇᐅᔭᖅᑖᖅᑎᑕᐅᕗᑦ

ᓈᓴᐅᑖ CanNor-09-004

ᐃᖃᓗᐃᑦ, ᓄᓇᕗᑦ (ᓯᑎᐱᕆ 11, 2009) –ᓴᒃ ᔅᑐᕌᓪ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᒥᓂᔅᑕᕆᔭᐅᔪᖅ, ᐊᐃᑉᐸᖃᖅᖢᓂ ᑖᓂᐊᓕ ᓯᐅᓴᒃᒥᒃ, ᓄᓇᕗᒻᒥᐅᑦ ᐊᕙᑎᓕᕆᓂᕐᒧᑦ ᒥᓂᔅᑕᖓᓐᓂᒃ, ᐅᓪᓗᒥ ᓇᓗᓇᐃᖅᓯᖅᑲᐅᕘᒃ ᐱᕐᔪᐊᓂᒃ ᐱᓕᕆᐊᖑᔪᒃᓴᓂᒃ ᓴᓐᖏᒃᑎᑉᐹᓪᓕᕈᓐᓇᕐᓂᐊᕐᒪᑦ ᓄᓇᕗᑦ ᐃᖃᓗᓕᕆᓂᒃᑯᑦ ᑮᓇᐅᔭᓕᐅᕋᓱᐊᖅᑏᑦ.

“ᓄᓇᕗᑦ ᑕᕆᐅᖏᑦ ᐃᒪᖁᑎᖏᓪᓗ ᐊᕐᕌᒍᒐᓵᓗᖕᓄᑦ ᐊᓐᓇᐅᒪᑎᑦᑎᓯᒪᓕᖅᑐᖅ ᐃᓚᒌᓂᒃ ᐊᒻᒪᓗ ᓄᓇᓕᖕᓂᒃ.  ᑕᕆᐅᖅ ᐊᒃᑐᐃᓂᖃᓪᓚᕆᒃᑐᖅ ᐱᖅᑯᓯᑐᖃᕐᓂᒃ, ᐃᓅᖃᑎᒌᖕᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒥᒃ ᓄᓇᕗᒻᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᒃᑯᐊ ᐊᖅᑯᑕᐅᓗᑎᒃ ᓄᓇᕗᒻᒥ ᐃᖃᓗᓕᕆᓂᖅ ᐱᕚᓪᓕᓪᓚᕆᖕᓂᐊᖅᑐᖅ ᐊᒻᒪᓗ ᓇᖕᒥᓂᖅ ᒪᑭᒪᔪᓐᓇᖅᓯᓗᑎᒃ.” 

“ᖁᕕᐊᕐᔪᐊᖅᑐᒍᑦ ᐱᕕᖃᖅᑎᑕᐅᒃᑲᓐᓂᕋᑦᑕ ᑖᒃᑯᑎᒎᓇᖅ ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᓄᑦ ᑮᓇᐅᔭᓄᑦ, ᓄᓇᕗᒻᒥᐅᓄᑦ ᐱᕚᓪᓕᐅᑕᐅᓪᓚᕆᖕᓂᐊᕐᒪᑕ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᓯᐅᓴᒃ.  “ᑖᒃᑯᐊ ᑮᓇᐅᔭᑦ ᐊᑐᕐᓗᒋᑦ, ᒫᓐᓇ ᖃᐅᔨᓴᖅᑕᕗᑦ ᐅᓄᖅᓯᒋᐊᒃᑲᓐᓂᕈᓐᓇᕐᓂᐊᓕᖅᑕᕗᑦ ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑎᕗᑦ, ᑕᒪᒃᑮᖕᓂ ᑕᓯᕐᓂ ᐊᒻᒪᓗ ᐃᒪᕕᖕᒥ, ᐃᖃᓗᓕᕆᓂᖅ ᐱᕚᓪᓕᐅᑕᐅᒃᑲᓐᓂᕈᓐᓇᕐᓂᐊᕐᒪᑦ ᐊᒻᒪᓗ ᓂᕆᐅᒃᐳᒍᑦ ᑕᒪᒃᑯᐊ ᑲᔪᓯᑎᓐᓂᐊᕐᓂᑦᑎᓐᓂᒃ ᓯᕗᓂᒃᓴᑦᑎᓐᓂ.”

ᑕᒪᓐᓇ ᑲᑐᔾᔭᐅᔪᖅ ᑲᓇᑕᐅᑉ ᐊᒻᒪᓗ ᐅᑭᐅᖅᑕᖅᑑᑉ ᒐᕙᒪᖏᓐᓄᑦ $1.5 ᒥᓕᐊᓐ ᐅᖓᑖᓃᑦᑐᑦ, ᐊᒻᒪᓗ ᐊᕐᕌᒎᖕᓄᑦ ᒪᕐᕉᖕᓄᑦ ᓴᖅᑭᔮᖅᑎᑕᐅᓂᐊᖅᖢᓂ.  ᐃᑲᔫᑕᐅᓂᐊᖅᑐᖅ ᖃᐅᔨᒪᔭᑐᖃᕐᓄᑦ ᐊᒻᒪᓗ ᐃᖅᑲᓇᐃᔭᖅᑎᒃᓴᖅᓯᐅᕐᓂᕐᒧᑦ ᓄᓇᕗᒻᒥ ᐃᖃᓗᓕᕆᓂᕐᒥ ᐊᑐᖅᑐᒃᓴᓂᒃ.  ᓄᓇᕗᑦ ᒐᕙᒪᒃᑯᖏᑦᑕ ᐊᕙᑎᓕᕆᔨᒃᑯᖏᑦ, ᐃᖃᓗᓕᕆᓂᕐᒧᑦ ᓇᑦᑎᓕᕆᓂᕐᒧᓪᓗ ᐱᓕᕆᕝᕕᖏᑦ ᑕᒪᒃᑯᓂᖓ ᐊᐅᓚᑦᑎᔨᐅᓂᐊᖅᑐᑦ.  ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᖏᑦᑎᒍᑦ ᑕᒫᓂ $620,000-ᓂᒃ ᑮᓇᐅᔭᖅᑖᕐᓂᐊᖅᑐᑦ ᒪᕐᕉᖕᓄᑦ ᐱᓕᕆᐊᖕᓄᑦ, ᐊᒻᒪᓗ ᓴᓐᖏᒃᑎᒋᐊᕈᑕᐅᓂᐊᖅᖢᓂ ᐊᔾᔨᒌᓐᖏᑦᑐᓂᒡᓗ ᐆᒃᑑᑕᐅᓂᐊᖅᖢᓂ ᑎᓄᔾᔭᕕᖕᒥ ᑕᓯᕐᓂ ᐃᖃᓗᓕᕆᓂᕐᒧᑦ.  ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑮᓇᐅᔭᑦ ᐃᑲᔫᑕᐅᓂᐊᕐᒥᔪᑦ ᐃᓕᓐᓂᐊᖅᑎᑦᑎᔾᔪᑕᐅᓂᐊᕐᒪᑕ ᐅᒥᐊᕋᓛᖑᓂᖅᓴᐅᔪᓂᒃ ᐊᑐᕐᓗᓂ ᐊᐅᓚᑦᓯᓂᕐᒥᒃ. 

$60,000-ᒃᑲᓃᑦ ᓴᒡᕙᖅᑕᐅᓂᐊᕐᒥᔪᑦ ᐊᑐᕐᓗᒋᑦ ᓄᑖᓐᖑᕆᐊᖅᑎᑕᐅᓚᐅᖅᑐᑦ  Strategic Investments in Northern Economic Development (ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᐊᕐᓂᖅ ᐱᕙᓪᓕᐊᑎᑕᐅᓂᖓᓄᑦ) ᐱᓕᕆᐊᖅ. ᑕᒪᓐᓇ ᐱᓕᕆᐊᖅ ᐱᕚᓪᓕᐅᑕᐅᓂᐊᖅᑐᖅ ᐊᔾᔨᒌᓐᖏᑦᑐᓂᒃ ᐆᒪᔪᓂᒃ ᖃᐅᔨᓴᐃᓂᕐᒥᒃ ᕿᑭᖅᑖᓘᑉ ᓄᓇᕕᐅᓪᓗ ᐃᑭᕋᓴᖓᓐᓃᑦᑐᓂᒃ.

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᐊᕐᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᑐᖅᑐᒃᓴᑦ ᑮᓇᐅᔭᑦ ᐊᒻᒪᓗ ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᑖᒃᑯᐊ ᓴᖅᑭᑕᐅᓵᓚᐅᖅᑐᑦ ᐱᔭᒃᓴᖅᑖᖅᑎᑕᐅᓯᒪᓪᓗᑎᒃ ᑐᑭᒧᐊᒃᑎᑦᑎᓂᕐᒥᒃ ᓴᖅᑭᑦᑎᖃᑦᑕᕐᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓕᐊᕆᓯᒪᔭᖏᓐᓂᒃ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥ, ᐊᒻᒪᓗ ᐱᓕᕆᐊᖃᕆᓪᓗᑎᒃ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.

ᑕᒪᑐᒪ ᓇᓗᓇᐃᖅᑕᐅᓂᖓ ᑲᓇᑕᐅᑉ ᒐᕙᒪᒃᑯᖏᑦᑕ ᐃᖅᑲᓇᐃᔮᕆᔭᖏᓐᓂᒃ ᓯᕗᒧᐊᒃᑎᑦᑎᕚᓪᓕᐅᑕᐅᓂᐊᖅᑐᖅ ᑲᑎᓐᖓᔾᔫᒥᓕᕐᓂᐊᕐᒪᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑏᑦ ᐊᒻᒪᓗ ᑲᓇᑕᒥᐅᑕᐅᖃᑕᐅᓂᖓ ᐅᑭᐅᖅᑕᖅᑐᖅ ᓇᓗᓇᐃᖅᑕᐅᒃᑲᓐᓂᕐᓗᓂ, ᓴᐳᒻᒥᐅᓯᖅᑕᐅᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᐃᑦ, ᓴᖅᑭᑎᑕᐅᒃᑲᓐᓂᕐᓗᑎᒃ ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕈᑎᓪᓗ ᐊᒻᒪᓗ ᐅᑭᐅᖅᑕᖅᑐᒥ ᐊᐅᓚᑕᐅᓂᖓ ᑎᒍᒥᐊᖅᑕᐅᑦᑎᐊᒃᑲᓐᓂᓕᕐᓗᓂ.

ᐱᒋᐊᕐᓂᕕᓂᐊ - ᑮᓇᐅᔭᓂᒃ ᓴᒡᕙᐃᓂᖅ ᐊᑐᖅᑕᐅᔪᒃᓴᓂᒃ ᑕᓯᕐᓂ ᐃᒪᕕᖕᒥᓗ ᐃᖃᓗᒐᓱᖕᓂᕐᒧᑦ ᓄᓇᕗᒻᒥ

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

CanNor Communications
ᓄᓇᕗᒻᒥ ᑐᑦᑕᕐᕕᖓᑦ
(867) 975-4725