ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᓄᓇᕗᒻᒥ ᓄᓇᓂᒃ ᖃᐅᔨᓴᐃᓂᕐᒥᒃ ᐃᑲᔪᖅᓱᐃᕗᑦ

CanNor-09-007

ᐃᖃᓗᐃᑦ, ᓄᓇᕗᑦ (ᓯᑎᐱᕆ 25, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᐱᖓᓲᔪᖅᑐᓂᒃ ᓄᓇᓂᒃ ᖃᐅᔨᓴᐃᓂᐅᓂᐊᖅᑐᓂᒃ ᓄᓇᕗᒻᒥ.  ᑕᒪᓐᓇ ᓴᖅᑭᑦᑐᓐᓇᖅᓯᓚᐅᖅᑐᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦᑎᒍᑦ ᐊᒻᒪᓗ ᓯᕗᓂᒃᓴᒥ ᓄᓇᒥᐅᑕᓂᒃ ᕿᓂᕐᓂᕐᒧᑦ ᑮᓇᐅᔭᓂᒃ ᓴᒡᕙᐃᑎᑦᑎᔾᔪᑕᐅᒃᑲᓐᓂᕈᓐᓇᕐᓂᐊᖅᖢᓂ ᓄᓇᕗᒻᒦᑦᑐᓂᒃ.

“ᑐᑭᓯᐅᒪᒃᑲᓐᓂᓕᕈᑦᑕ ᓄᓇᕗᑦ ᓄᓇᖁᑖᓂᒃ ᐊᔾᔨᐅᓐᖏᑦᑐᒥᒃ ᐃᑲᔪᖅᓲᑕᐅᒃᑲᓐᓂᕈᓐᓇᕐᓂᐊᖅᑐᖅ ᐊᕗᖓᐅᔨᒃᑲᓐᓂᕐᓂᐊᕐᒪᑦ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᖅ ᑕᒫᓂ ᓄᓇᕗᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᐅᓪᓗᒥ ᖃᐅᔨᓴᐃᓂᕐᒧᑦ ᑮᓇᐅᔭᓂᒃ ᓴᒡᕙᐃᒍᑦᑕ, ᓄᓇᕗᒻᒥᐅᑦ ᓄᓇᓕᖁᑎᖏᓐᓂᒃ ᐱᕕᑖᖅᑎᑦᑎᒃᑲᓐᓂᖅᐳᒍᑦ ᓯᕗᓂᒃᓴᒥ ᓴᖅᑭᕕᐅᒃᑲᓐᓂᕈᓐᓇᕐᓂᖏᓐᓂᒃ.”

“ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᖅ ᐱᒻᒪᕆᐅᕗᖅ ᐃᓚᒋᔭᐅᖃᑕᐅᑎᓪᓗᒍ ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᑖᒃᑯᓄᖓ ᑮᓇᐅᔭᓂᒃ ᓴᒡᕙᐃᓂᖅ ᐱᔾᔪᑕᐅᓗᓂ ᐱᕈᖅᐸᓪᓕᐊᒃᑲᓐᓂᐅᑕᐅᔪᓐᓇᕐᓂᐊᖅᑐᖅ ᓯᕗᓂᒃᓴᑦᑎᓐᓂ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᒥ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ.

ᑲᓇᑕᐅᑉ ᒐᕙᒪᒃᑯᖏᑦ $1.1 ᒥᓕᐊᓐᓂᒃ ᐊᑐᐃᓐᓇᕈᐃᓂᐊᖅᑐᑦ ᐊᖅᑯᑎᒋᔭᐅᓗᓂ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ.  ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐱᖓᓲᔪᖅᑐᓄᑦ ᓄᓇᓂᒃ ᖃᐅᔨᓴᐅᑎᓄᑦ ᐱᔭᕇᖅᑕᐅᔪᒃᓴᒫᖑᔪᓄᑦ 2009-ᒥ ᐃᖅᑲᓇᐃᔭᕐᓇᕐᒥ.  ᓄᓇᕗᑦ ᒐᕙᒪᒃᑯᑦ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔾᔪᑎᓕᕆᔨᒃᑯᓪᓗ ᐱᓕᕆᕝᕕᖓᑦ ᐊᐅᓚᑦᓯᔨᐅᓂᐊᖅᑐᑦ 2009-10-ᒥ ᓄᓇᓂᒃ ᖃᐅᔨᓴᐃᓂᐅᓂᐊᖅᑐᓂᒃ, ᐊᒻᒪᓗ ᐱᓕᕆᐊᑦ ᐊᐅᓚᑕᐅᓂᐊᖅᖢᑎᒃ ᑲᓇᑕ-ᓄᓇᕗᑦ ᓄᓇᓕᕆᓂᕐᒧᑦ ᑎᑎᕋᕐᕕᖓᓐᓄᑦ, ᐃᑲᔪᖅᑕᐅᓗᑎᒃ ᑲᓇᑕᒥ ᓄᓇᓕᕆᓂᕐᒥᒃ ᖃᐅᔨᓴᐃᔨᓄᑦ.  ᑕᒪᒃᑯᐊ ᐃᓗᓕᑯᓘᔭᖏᑦ ᐅᓂᒃᑲᐅᓯᕆᔭᐅᑦᑎᐊᖅᓯᒪᔪᑦ ᐱᒋᐊᕐᓂᕕᓂᖏᑦᑕ ᑎᑎᖅᑲᖏᑦᑎᒍᑦ.

“ᓄᓇᐃᑦ ᓄᓇᓐᖑᐊᓕᐅᖅᑕᐅᓂᖏᑦ ᐊᒻᒪᓗ ᖃᐅᔨᓴᖅᑕᐅᓂᖏᑦ ᓄᓇᕗᒻᒥ ᐱᒻᒪᕆᐅᕗᑦ ᐅᔭᕋᒃᓯᐅᖅᑏᑦ ᓄᓇᒥᐅᑕᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᕿᓂᖃᑦᑕᕐᓂᖏᑦ ᐱᔾᔪᑎᒋᓪᓗᒋᑦ,” ᑕᐃᒪᓐᓇ ᐅᖃᓚᐅᖅᑐᖅ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔾᔪᑎᓕᕆᓂᕐᒧᓪᓗ ᒥᓂᔅᑕ ᐲᑕ ᑕᑉᑑᓇ.  “ᑲᓇᑕ-ᓄᓇᕗᑦ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᐅᑉ ᐃᖅᑲᓇᐃᔮᕆᔭᖏᑦ ᐃᑲᔫᑕᐅᓂᐊᖅᑐᖅ ᓄᑖᓂᒃ ᐱᕚᓪᓕᐅᑎᒃᓴᖅᓯᐅᖅᑎᓪᓗᑕ ᓄᓇᓕᖁᑎᑦᑎᓐᓄᑦ.  ᑖᒃᑯᐊ ᑮᓇᐅᔭᑦ ᐊᒃᓱᐊᓗᒃ ᐃᑲᔪᕐᓂᖃᕐᓂᐊᖅᑐᑦ.”

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑐᕌᖓᔪᑦ ᐱᔭᒃᓴᖅᑖᕆᔭᐅᖃᑕᐅᓯᒪᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᓵᓐᖓᓪᓗᐊᖅᖢᑎᒃ ᐊᕗᖓᐅᔨᓯᒪᔪᒧᑦ ᑮᓇᐅᔭᓕᐅᕋᓱᐊᕈᑎᒃᓴᖅᓯᐅᕐᓂᕐᒥᒃ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ. 

ᐱᕙᓪᓕᐊᔪᒃᑰᖅᑎᑕᐅᔪᕕᓃᑦ ᑕᑯᒋᐊᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ: see the CanNor website

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ: www.actionplan.gc.ca
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᐅᒪᔾᔪᑎᓕᕆᔨᖏᑦ
ᓄᓇᕗᒻᒥ ᑐᑦᑕᕐᕕᖓᑦ
(867) 975-4537