ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᔫᑳᓐᒥ ᕿᒧᒃᓯᐅᔾᔪᐊᕐᓂᕐᒥᒃ

CanNor-09-021

ᕙᐃᑦᕼᐅᐊᔅ, ᔫᑳᓐ (ᕕᕗᐊᕆ 03,  2010) – ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᓴᖅᑭᔮᖅᑎᑦᑎᒃᑲᓐᓂᕋᓱᒃᐳᑦ ᐳᓚᕋᖅᑐᓕᕆᓂᕐᒥᒃ ᔫᑳᓐᒥ ᐃᑲᔪᖅᓱᐃᓂᒃᑯᑦ ᐅᑭᐅᒃᑯᑦ ᑕᑯᔪᒥᓇᕐᓂᖅᐹᖑᕙᒃᑐᒥᒃ, ᔫᑳᓐᒥ ᕿᒧᒃᓯᐅᔾᔪᐊᕐᓂᕐᒥᒃ.

ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᑕᒪᑐᒥᖓ ᓇᓗᓇᐃᖅᓯᖅᑲᐅᕗᖅ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᔫᑳᓐᒥ ᓄᓇᕐᔪᐊᕐᒥᐅᑦ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᑦ (ᑲᓇᑕ) ᑮᓇᐅᔭᖅᑖᖅᑎᑕᐅᓂᐊᖅᑐᑦ $262,320-ᓂᒃ ᑕᒪᓐᓇ ᐊᕐᕌᒍᑕᒫᖅ ᓴᖅᑭᔮᖅᑎᑕᐅᖃᑦᑕᖅᑐᖅ ᐃᑲᔪᖅᑕᐅᔪᓐᓇᕐᓂᐊᕐᒪᑦ ᑮᓇᐅᔭᖅᑎᒍᑦ.  ᑖᒃᑯᐊ ᑮᓇᐅᔭᑦ 2010 ᐊᒻᒪᓗ 2011-ᒥ ᕿᒧᒃᓯᐅᔾᔪᐊᕐᓂᐊᕐᓂᕐᒧᑦ ᐅᐸᓗᖓᐃᔭᐃᔾᔪᑕᐅᓂᐊᖅᑐᑦ, ᐱᐅᓯᒋᐊᖅᑕᐅᓗᓂ ᐊᑐᖅᑕᐅᓂᐊᖅᑐᑦ ᐃᓂᖏᓐᓂ ᐱᖁᑎᕐᔪᐊᑦ, ᐊᒻᒪᓗ ᐃᑲᔪᖅᓲᑕᐅᒃᑲᓐᓂᕐᓗᑎᒃ ᓂᐅᕐᕈᑎᖃᕋᓱᐊᕐᓂᕐᒧᑦ ᑐᕌᖓᔪᓂᒃ ᐋᖅᑭᒃᓱᐃᑎᓪᓗᒋᑦ.

“ᔫᑳᓐᒥ ᕿᒧᒃᓯᐅᔾᔪᐊᕐᓂᖅ ᐱᔾᔪᑕᐅᓪᓗᓂ ᐊᒥᓱᕐᔪᐊᒻᒪᕆᐊᓗᐃᑦ ᔫᑳᓐᓕᐊᖃᑦᑕᖅᑐᑦ ᐊᕐᕌᒍᑕᒫᖅ, ᐅᑭᐅᖅᑕᖅᑐᕐᒥᒃ ᑕᑯᔭᖅᑐᖅᖢᑎᒃ, ᐊᒻᒪᓗ ᔫᑳᓐᒥᐅᑦ ᐱᑐᒃᑲᓐᓂᖃᑦᑕᖅᖢᑎᒃ ᐊᑐᖅᑕᐅᖃᑦᑕᖅᑐᑐᖃᐅᓚᐅᖅᓯᒪᔪᓄᑦ ᐃᓕᖅᑯᓯᑐᖃᕐᒥᓄᓪᓗ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ. “ᑖᒃᑯᐊ ᑮᓇᐅᔭᑦ ᐱᕚᓪᓕᐅᑕᐅᓪᓚᕆᖕᓂᐊᖅᑐᖅ ᕿᒧᒃᓯᐅᔾᔪᐊᕐᓂᕐᒧᑦ ᐊᒻᒪᓗ ᐳᓚᕋᖅᑎᓄᑦ ᕿᒧᒃᓯᖃᑕᐅᔪᓄᓪᓗ.”

“ᑕᒪᓐᓇ ᐊᕐᕌᒍᑕᒫᖅ ᓴᖅᑭᔮᖅᑎᑕᐅᖃᑦᑕᖅᑐᖅ ᐊᒃᓱᐊᓗᒃ ᐱᕚᓪᓕᐅᑕᐅᔪᖅ ᔫᑳᓐᒥᐅᓄᑦ, ᐱᓯᓂᓯᖃᖅᑐᓄᑦ ᑮᓇᐅᔾᔭᒃᑲᓐᓂᐅᑕᐅᖃᑦᑕᖅᖢᓂ ᐊᒻᒪᓗ ᔫᑳᓐᒥᐅᑦ ᐃᖅᑲᓇᐃᔮᖅᑖᒃᑲᓐᓂᕈᓐᓇᖃᑦᑕᖅᖢᑎᒃ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᒥ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ.  ᑲᓇᑕᐅᑉ ᒐᕙᒪᒃᑯᖏᑦ ᐅᐱᑉᐳᑦ ᐃᑲᔪᖅᓱᐃᔪᓐᓇᕋᒥᒃ ᔫᑳᓐᒥ ᓄᓇᕐᔪᐊᕐᒥᐅᑦ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᓐᓂᒃ, ᑕᒪᓐᓇ ᐊᕗᖓᐅᔭᖅ ᓴᖅᑭᔮᖅᑎᑕᐅᖃᑦᑕᕈᓐᓇᕐᓂᐊᕐᒪᑦ.

"ᖁᕕᐊᓱᒃᑐᕐᔪᐊᒻᒪᕆᐊᓘᔪᒍᑦ ᑖᒃᑯᓂᖓ ᑮᓇᐅᔭᓂᒃ ᐱᑎᑕᐅᔪᓐᓇᓚᐅᕋᑦᑕ,” ᑕᐃᒪᓐᓇ ᐅᖃᓚᐅᖅᑐᖅ ᐋᓪ ᑑᕼᐅᑎ, ᐊᖓᔪᖅᑳᕆᔭᐅᔪᖅ ᔫᑳᓐᒥ ᓄᓇᕐᔪᐊᕐᒥᐅᑦ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᓐᓄᑦ (ᑲᓇᑕ).  “ᔫᑳᓐᒥ ᕿᒧᒃᓯᐅᔾᔪᐊᕐᓂᖅ ᐱᑐᒃᓯᓯᒪᐅᑕᐅᕗᖅ ᓄᓇᓕᖕᓄᑦ ᐊᒻᒪᓗ ᔫᑳᓐᒥᐅᓄᑦ ᕿᒧᒃᓰᑦ ᐊᖅᑯᑎᖏᓐᓃᑦᑐᓄᑦ.  ᑖᒃᑯᓂᖓ ᑮᓇᐅᔭᖅᑖᖅᑎᑕᐅᓂᕗᑦ ᐊᑐᕐᓗᒍ ᔫᑳᓐᒥ ᕿᒧᒃᓯᐅᔾᔪᐊᕐᓂᒃᑯᑦ ᑮᓇᐅᔭᓕᐅᕈᑕᐅᒃᑲᓐᓂᕈᓐᓇᕐᓂᐊᖅᑐᖅ ᓄᓇᓕᖁᑎᑦᑎᓐᓄᑦ ᐊᒻᒪᓗ ᐊᖅᑯᑖ ᐱᐅᓯᒋᐊᖅᑕᐅᒃᑲᓐᓂᕈᓐᓇᖅᖢᓂ ᐊᒻᒪᓗ ᒪᑭᒪᑦᑎᐊᕈᓐᓇᖅᖢᓂ ᕿᒧᒃᓯᐅᔾᔪᐊᕐᓂᖅ.”

ᑖᒃᑯᐊ ᑮᓇᐅᔭᖅᑖᖅᑎᑕᐅᔪᓐᓇᓚᐅᖅᑐᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ (Canada's Economic Action Plan). ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑮᓇᐅᔭᑦ ᐱᔭᒃᓴᖅᑖᖑᖃᑕᐅᓯᒪᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᓵᓐᖓᓗᐊᓐᖑᐊᖅᖢᑎᒃ ᐊᕗᖓᐅᔨᓯᒪᔪᓄᑦ ᑮᓇᐅᔭᓕᐅᕈᑕᐅᕙᓪᓕᐊᓇᔭᖅᑐᓄᑦ, ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐊᔾᔨᒌᓐᖏᑦᑑᓂᖏᓐᓄᑦ ᐊᒻᒪᓗ ᓴᓇᕐᕈᑎᒃᓴᖅᑖᖅᑐᖅᑎᑕᐅᕙᓪᓕᐊᓂᖏᑦ ᐱᖓᓱᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᓖᑦ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓂ. 

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐱᕙᓪᓕᐊᔪᒃᑰᖅᑎᑕᕕᓂᖏᓐᓂᒃ ᑕᑯᒋᐊᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ
ᑳᑦᓖᓐ ᒪᒃᓚᐅᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(613) 995-776

ᔫᑳᓐᒥ ᓄᓇᕐᔪᐊᕐᒥᐅᑦ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᑦ (ᑲᓇᑕ)
ᐅᐃᓐᑎ ᒨᕆᓴᓐ
ᐊᖓᔪᖅᑳᖅ
867.668.4711
wendy.morrison@yukonquest.com