ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᔫᑳᓐᒥ ᕿᒧᒃᓯᐅᔾᔪᐊᕐᓂᐅᓂᐊᖅᑐᒥᒃ

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ, ᑭᒡᒐᖅᑐᖅᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ, $262,320-ᓂᒃ ᑮᓇᐅᔭᖃᖅᑎᑦᑎᓂᐊᖅᑐᑦ ᔫᑳᓐᒥ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᓐᓂᒃ (ᑲᓇᑕ).  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ ᑮᓇᐅᔭᑦ ᒪᐅᖓᑦᑎᐊᖅ ᐊᑐᖅᑕᐅᓂᐊᖅᑐᑦ ᓴᖅᑭᑕᐅᔪᓐᓇ3ᓂᐊᕐᒪᑦ ᕿᒧᒃᓯᐅᔾᔪᐊᕐᓂᐅᓂᐊᖅᑐᖅ 2010-ᒥ ᐊᒻᒪᓗ 2011-ᒥ, ᐊᒻᒪᓗ ᐃᑲᔫᑕᐅᓂᐊᕆᓪᓗᓂ ᐊᕗᖓᐅᔨᓯᒪᔪᒃᑯᑦ ᑕᖅᑳᓐᖓᑦ ᑮᓇᐅᔭᖅᑖᖅᑎᑕᐅᖃᑦᑕᕐᓂᖏᓐᓄᑦ ᐊᒻᒪᓗ ᓂᐅᕐᕈᑎᒃᓴᓕᐅᕐᓂᕐᒧᑦ ᑐᕌᖓᔪᓂᒃ ᐋᖅᑭᒃᓱᐃᕙᓪᓕᐊᔪᓐᓇᕐᓂᐊᕐᒪᑕ.

ᔫᑳᓐᒥ ᕿᒧᒃᓯᐅᔾᔪᐊᖅᑏᑦ ᑲᑐᔾᔨᖃᑎᒌᖏᑦ (ᑲᓇᑕ) ᐊᑎᓕᐅᖅᓯᒪᓪᓗᑎᒃ ᑮᓇᐅᔭᓕᐅᖅᑎᐅᓇᓱᓐᖏᖢᑎᒃ ᑎᒥᓐᖑᖅᑎᑕᐅᓯᒪᕗᑦ, ᑐᕌᒐᖃᓗᐊᖅᖢᑎᒃ ᐊᕐᕌᒍᑕᒫᖅ ᔫᑳᓐᒥ ᕿᒧᒃᓯᐅᔾᔪᐊᕐᓂᖅ ᑲᔪᓯᖃᑦᑕᕈᓐᓇᕐᓂᐊᕐᒪᑦ, ᕿᒧᒃᓯᐅᔾᔪᐊᖃᑦᑕᕐᒪᑕ 1,607 ᑭᓚᒦᑕᓂᒃ ᐅᖓᓯᖕᓂᓕᖕᒥᒃ ᕙᐃᑦᕼᐅᐊᔅ ᔫᑳᓐᒥᑦ ᕕᐅᐹᖕᒃ ᐊᓛᔅᑲᒧᑦ.  ᕿᒧᒃᓯᐅᔾᔪᐊᖃᑦᑕᖅᑐᑦ ᐃᒻᒪᑲᓪᓛᓗᒃ ᐊᖅᑯᑎᒋᔭᐅᕙᓚᐅᖅᓯᒪᔪᖅ ᒎᓗᓯᐅᕆᐊᖅᑐᐊᓗᖕᓄᑦ ᐊᑐᖅᑕᐅᓪᓗᓂ, ᑕᒪᓐᓇ ᐱᒻᒪᕆᐅᓪᓗᓂ ᐃᓚᒋᔭᐅᖃᑕᐅᖕᒪᑦ ᔫᑳᓐᒥᐅᑦ ᐱᖅᑯᓯᑐᖃᖏᓐᓄᑦ, ᐊᒻᒪᓗ ᐊᕐᕌᒍᑕᒫᖅ ᕿᒧᒃᓯᐅᔾᔪᐊᕐᓇᐅᓕᕌᖓᑦ ᐅᓄᖅᑐᕐᔪᐊᒻᒪᕆᐊᓗᐃᑦ ᔫᑳᓐᓕᐊᖃᑦᑕᖅᖢᑎᒃ.

ᑕᐃᒪᓐᖓᓂᑦ ᐱᒋᐊᖅᑕᐅᓚᐅᖅᓯᒪᑎᓪᓗᒍ 1984-ᒥ, ᕿᒧᒃᓯᐅᔾᔪᐊᕐᓂᖅ ᐊᖏᒡᓕᕚᓪᓕᖅᑐᕐᔪᐊᒻᒪᕆᐊᓗᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᓪᓚᕆᐊᓘᓕᖅᖢᓂ ᔫᑳᓐᒥᐅᓄᑦ.

ᕿᒧᒃᓯᐅᔾᔪᐊᖅᑎᓪᓗᒋᑦ ᑕᒫᓂ 30-ᖏᓐᓃᑦᑐᓂᒃ ᐃᖅᑲᓇᐃᔭᑲᐃᓐᓇᖅᑐᑦ ᐃᓂᒃᓴᖏᓐᓂᒃ ᒪᑐᐃᖅᑐᖃᖃᑦᑕᖅᑐᖅ ᑎᓴᒪᓂᑦ ᔫᑳᓐ ᓄᓇᓕᖁᑎᖏᓐᓂ, ᐊᒻᒪᓗ ᑮᓇᐅᔾᔭᒃᓴᒃᑲᓐᓂᖃᑦᑕᖅᖢᑎᒃ ᐱᓯᓂᓯᖃᕐᕕᐅᔪᑦ ᐅᑭᐅᒃᑯᑦ ᑮᓇᐅᔭᓕᐅᕐᓇᓗᐊᓐᖏᑎᓪᓗᒍ.

2006-ᖑᑎᓪᓗᒍ, ᑕᒫᓂ $1.16 ᒥᓕᐊᓐᖏᓐᓃᑦᑐᓂᒃ ᑮᓇᐅᔭᐃᔭᕐᕕᐅᖃᑦᑕᖅᑐᑦ ᔫᑳᓐᒥ, ᒪᓕᒃᖢᒋᑦ 2006-ᒥ ᑮᓇᐅᔭᓕᐅᕋᓱᐊᕈᑏᑦ ᐊᒃᑐᖅᑕᐅᓂᖏᑦᑕ ᖃᐅᔨᓴᖅᑕᐅᓂᖏᑦ ᕿᒧᒃᓯᐅᔾᔪᐊᕐᓂᕐᒧᑦ, ᑖᒃᑯᐊᓗ ᓴᖅᑭᑕᐅᓚᐅᖅᓯᒪᓪᓗᑎᒃ ᔫᑳᓐ ᒐᕙᒪᒃᑯᖏᓐᓄᑦ.

ᕿᒧᒃᓯᐅᔾᔪᐊᖅᑐᓄᑦ ᐊᖅᑯᑎᒋᔭᐅᖃᑦᑕᖅᑐᖅ ᐱᐅᓯᒋᐊᖅᑕᐅᒃᐸᑦ, ᑖᒃᑯᐊ ᑮᓇᐅᔭᑦ ᐊᕗᖓᐅᔨᓯᒪᔪᓄᑦ ᕿᒧᒃᓯᐅᔾᔪᐊᕐᓂᕐᒧᑦ ᐊᑐᖅᑐᓄᑦ ᐃᑲᔫᑕᐅᓂᐊᕐᒥᔪᑦ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐅᑯᓄᖓ ᑎᓴᒪᓄᑦ ᓵᓐᖓᓗᐊᓐᖑᐊᕐᓗᑎᒃ ᑮᓇᐅᔭᖃᖅᑎᑦᑎᓂᐊᖅᑐᑦ:

• 2010 ᐊᒻᒪᓗ 2011-ᒥ ᕿᒧᒃᓯᐅᔾᔪᐊᖅᑐᑦ ᑐᓐᖓᕕᒃᓴᖏᑦᑕ ᑲᔪᓯᑎᑕᐅᑦᑎᐊᕐᓂᐊᕐᓂᖏᑦ
  ᐃᓗᓕᖃᖃᓯᐅᔾᔨᓯᒪᕗᑦ ᕿᒧᒃᓯᐅᔾᔪᐊᕐᓂᐊᖅᑐᑦ ᐊᖅᑯᑎᒃᓴᖏᑦ ᐱᐅᓯᒋᐊᖅᑕᐅᓗᑎᒃ 2010 ᐊᒻᒪᓗ 2011-ᒥ ᐊᑐᖅᑕᐅᓂᐊᖅᑎᓪᓗᒋᑦ, ᐊᒻᒪᓗ ᓂᐅᕕᕐᓗᑎᒃ ᐊᑦᑕᓇᔾᔭᐃᒃᑯᑎᓂᒃ ᑐᓴᐅᒪᔾᔪᑎᓕᕆᓂᕐᒧᓪᓗ ᐊᑐᖅᑐᓂᒃ, ᓲᕐᓗ ᖁᒻᒧᐊᒃᑎᑕᐅᓯᒪᔪᒃᑰᖅᑐᑦ ᐅᖄᓚᐅᑏᑦ, ᐆᕚᕆᐊᓖᑦ ᓈᓚᐅᑏᑦ, ᐊᑦᑕᓈᕿᔪᓄᑦ ᐊᑐᖅᑐᒃᓴᑦ ᐃᓅᓕᓴᐃᔾᔪᑏᑦ ᐊᒻᒪᓗ ᐊᖅᑯᑎᒋᓂᐊᖅᑕᖏᑦᑕ ᓴᓂᕌᓄᑦ ᐃᓕᐅᖅᑲᐃᓗᑎᒃ ᖃᐅᒪᔾᔪᑎᓂᒃ ᓇᓗᓇᐃᒃᑯᑕᓂᒃ.
  
  
• ᔅᑯᕉᒋ ᑯᕇᒃᒥ ᐃᒡᓗᕋᓛᖅ
  ᓄᑖᖅ ᐃᒡᓗᕋᓛᕐᒥᒃ ᐊᖏᓂᓕᒃ 16X20 ᒦᑕᒥᒃ ᓴᓇᓂᐊᖅᑐᑦ ᔅᑰᕉᒋ ᑯᕇᒃᒥ.  ᒫᓐᓇ ᑕᐃᓐᓇ ᐃᒡᓗᕋᓛᖅ ᓂᕈᑭᓗᐊᖅᑐᖅ ᓂᕿᓕᐅᕐᕕᒋᒋᐊᖓᓂᒃ ᐊᒻᒪᓗ ᓯᓂᒃᑕᕐᕕᐅᒋᐊᖓᓂᒃ ᕿᒧᒃᓯᖅᑎᓄᑦ ᐊᒻᒪᓗ ᐊᑭᓕᖅᓱᖅᑕᐅᓐᖏᓪᓗᑎᒃ ᐃᖅᑲᓇᐃᔭᖅᑎᓄᑦ.  ᐃᒡᓗᕋᓛᖅ ᓄᑖᖅ ᖃᐅᔨᓴᐃᕝᕕᖃᕐᓂᐊᖅᑐᖅ ᐃᓅᓕᓴᐃᔾᔪᑎᓄᓪᓗ ᑐᖅᑯᐃᕝᕕᖃᕐᓗᓂ ᓂᕐᔪᑎᓄᑦ ᐋᓐᓂᐊᓯᐅᖅᑎᐅᑉ ᐊᑐᖃᑦᑕᕐᓂᐊᖅᑕᖓᓂᒃ.
  
  
• ᐱᒋᕐᕕᖓ/ᐃᓱᓕᕝᕕᖓ ᐊᒻᒪᓗ ᓄᖅᑲᖅᑕᕐᕖᑦ ᓴᓇᔭᐅᒃᑲᓐᓂᕐᓂᐊᕐᓂᖏᑦ
  ᓴᐃᒍᐊᓕᖅᓱᐃᒃᑲᓐᓂᕐᓂᐊᖅᑐᑦ ᐊᒻᒪᓗ ᓄᖅᑲᖅᑕᕐᕖᑦ ᐋᖅᑭᒃᓱᖅᑕᐅᒃᑲᓐᓂᕐᓗᑎᒃ, ᕿᒧᒃᓯᐅᔾᔪᐊᖅᑐᑦ ᐊᑦᑕᓇᔾᔭᐃᖅᓯᒪᒃᑲᓐᓂᕐᓂᐊᕐᒪᑕ ᐊᒻᒪᓗ ᖁᕕᐊᓇᕐᓂᖅᓴᐅᓕᕐᓂᐊᕐᒪᑦ ᖁᓐᖏᐊᕆᐊᖅᑐᖅᑐᓄᑦ, ᐱᕙᓪᓕᐊᔪᓕᕆᔨᓄᑦ ᐊᒻᒪᓗ ᕿᒻᒥᓄᑦ ᕿᒧᒃᓯᐅᑎᓄᑦ.  ᐅᖃᓪᓚᒃᑐᓄᑦ ᓂᐱᖅᑯᖅᑐᓯᒋᐊᕈᑎᓂᒃ ᓂᐅᕕᕈᑎᒃ ᐋᖅᑭᒃᓱᐃᔩᑦ ᖁᓐᖏᐊᕆᐊᖅᑐᓄᑦ ᐱᕙᓪᓕᐊᔪᓕᕆᔨᓄᓪᓗ ᐅᓂᒃᑳᖃᑦᑕᕈᓐᓇᕐᓂᐊᖅᑐᑦ ᖃᓄᐃᑉᐸᓪᓕᐊᓕᕐᒪᖔᖏᑦ.  ᐱᕙᓪᓕᐊᔪᓕᕆᔩᑦ ᑕᒫᓂ ᐊᐱᖅᓱᖃᑦᑕᕈᓐᓇᕐᓂᐊᕐᒥᔪᑦ ᖁᓐᖏᐊᕆᐊᖅᑐᓂᒃ, ᑕᐃᒪᐃᓕᖓᒃᐸᑕᓗ ᑕᖅᑲᐅᖓ ᐱᕙᓪᓕᐊᔪᑦ ᖃᐅᔨᒪᓂᖅᓴᐅᓂᐊᖅᖢᑎᒃ.
  
  
• ᔫᑳᓐᒥ ᕿᒧᒃᓯᐅᔾᔪᐊᕐᓂᕐᒧᑦ ᑐᕌᖓᔪᑦ ᓂᐅᕐᕈᑕᐅᕙᓪᓕᐊᓂᐊᕐᓂᖓᑕ ᐊᑐᓕᖅᑎᑕᐅᓂᖓ
  ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᓴᖅᑭᑦᑎᕙᓪᓕᐊᔪᓐᓇᕐᓂᐊᕐᒪᑕ ᔫᑳᓐᒥ ᕿᒧᒃᓯᐅᔾᔪᐊᖅᑐᓕᕆᔪᓂᒃ ᓴᓇᕙᓪᓕᐊᓂᐊᕐᒪᑕ ᐊᒻᒪᓗ ᓂᐅᕐᕈᑎᖃᕋᓱᐊᕐᓂᕐᒧᑦ ᐸᕐᓇᐅᑎᓂᒃ ᐋᖅᑭᒃᓱᐃᕙᓪᓕᐊᔪᓐᓇᖅᓯᓂᐊᕐᒪᑕ, ᓄᑖᓂᒃ ᐊᕗᖓᐅᔨᓯᒪᔪᓂᒃ ᑮᓇᐅᔭᖅᑖᕐᕕᒃᓴᓂᒃ ᐱᓇᓱᒃᐸᓪᓕᐊᔪᓐᓇᕐᓂᐊᕐᒪᑕ ᓯᕗᓂᒃᓴᒥ ᕿᒧᒃᓯᐅᔾᔪᐊᖃᑦᑕᕐᓂᐊᖅᑎᓪᓗᒋᑦ ᐊᒻᒪᓗ ᐊᖅᑯᑕᐅᔫᑉ ᑮᓇᐅᔭᖅᑐᕈᑎᖏᑦ ᑲᒪᒋᔭᐅᔪᓐᓇᕐᓂᐊᕐᒪᑕ.  ᔫᑳᓐᒥ ᕿᒧᒃᓯᐅᔾᔪᐊᖅᑏᑦ ᓂᐅᕐᕈᑎᒃᓴᓕᕆᓂᕐᒧᑦ ᑐᑭᒧᐊᒃᑎᒥᒃ ᐃᖅᑲᓇᐃᔭᖅᑎᑦᑎᑲᐃᓐᓇᕐᓂᐊᖅᑐᑦ ᐊᑐᓕᖅᑎᑕᐅᔪᓐᓇᕐᓂᐊᕐᒪᑦ ᐸᕐᓇᐅᑎᓕᐊᖓᑦ.

ᑕᒪᑐᒧᖓ ᐱᒋᐊᖅᑎᑕᐅᔪᒪᔪᒧᑦ ᐃᑲᔪᖅᓲᑏᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒎᖅᑎᑕᑦ, ᑕᒪᓐᓇᓗ ᓴᖅᑭᑕᐅᔪᓐᓇᖅᓯᓚᐅᖅᖢᑎᒃ ᐊᖅᑯᑎᒋᓪᓗᒋᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ.  ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓅᖅᑐᑦ ᓴᖅᑭᑕᐅᖃᑦᑕᖅᐳᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓂ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᓴᖅᑭᑕᐅᓵᓚᐅᖅᐳᖅ ᐱᔭᒃᓴᖅᑖᖅᑎᑕᐅᓯᒪᓪᓗᑎᒃ ᑐᑭᒧᐊᒃᑎᑦᑎᓂᕐᒥᒃ ᐊᒻᒪᓗ ᓴᖅᑭᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᖏᓐᓂᒃ ᐅᑭᐅᖅᑕᖅᑐᒧᑦ.