ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᓄᓇᑦᓯᐊᕐᒥᐅᑦ ᐃᑲᔪᖅᓱᐃᕗᑦ ᖃᐅᔨᓴᐃᔪᒪᑎᓪᓗᒋᑦ ᐊᕐᕌᒍᓕᒫᖅ ᐊᑐᖅᑕᐅᖃᑦᑕᕈᓐᓇᕋᔭᖅᑐᒥᒃ ᐊᖅᑯᒻᒥᒃ ᕆᒡᓕᒥᑦ ᑕᒻᔅᑑ ᐊᖅᑯᑎᕐᔪᐊᖓᓄᓐᖓᐅᔪᒥᒃ

CanNor-09-020

ᔭᓗᓇᐃᕝ (ᔭᓄᐊᕆ 29, 2010) – ᓄᑖᕐᒥᒃ ᖃᐅᔨᓴᐅᒻᒧᒃ ᐱᒋᐊᖅᑎᑦᑎᔪᒪᓕᖅᐳᑦ ᑐᑭᓯᓂᐊᕋᒥᒃ ᐊᕐᕌᒍᓕᒫᖅ ᐊᑐᖅᑕᐅᖃᑦᑕᕈᓐᓇᕋᔭᖅᑐᒥᒃ ᐊᖅᑯᓯᐅᕈᓐᓇᕐᓂᐊᕐᒪᖔᕐᒥ ᕆᒡᓕᒥᑦ ᑕᒻᔅᑑ ᐊᖅᑯᑎᕐᔪᐊᖓᓄᑦ ᓄᓇᑦᓯᐊᕐᒥ.  ᑖᒃᑯᐊ ᑮᓇᐅᔭᖅᑖᖅᑎᑕᐅᓂᐊᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ (ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ).

ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᖃᖅᑎᑦᑎᓂᐊᕐᓂᖏᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒎᖅᑎᑕᐅᓂᐊᖅᑐᑦ.  ᓄᓇᑦᓯᐊᑉ ᒐᕙᒪᒃᑯᖏᓐᓂᓐᖔᕐᓂᐊᖅᑐᑦ ᓇᓗᓇᐃᖅᓯᕗᑦ 16-ᒋᓕᖅᑕᖓᓂ ᒪᓕᒐᓕᐅᖅᑏᑦ ᐃᑲᔪᖅᓱᐃᓂᖏᓐᓂᒃ ᕕᕗᐊᕆ 25, 2009-ᖑᑎᓪᓗᒍ, ᒪᑲᓐᔨ ᕚᓕᐅ ᐊᖅᑯᑎᕐᔪᐊᖓᓐᓂ ᐅᑭᐅᖅᑕᖅᑑᑉ ᓯᒡᔭᖓᓄᓐᖓᐅᔪᒥᒃ ᐊᖅᑯᓯᐅᕈᒪᑎᓪᓗᒋᑦ.

ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᕗᓗᐃᑦ ᕉᓚᓐ, ᓄᓇᑦᓯᐊᑉ ᓯᕗᓕᖅᑎᖓ, ᐊᒻᒪᓗ ᒪᐃᑯᓪ ᒪᒃᓚᐅᑦ, ᒥᓂᔅᑕᕆᔭᐅᔪᖅ ᐃᖏᕐᕋᔾᔪᑎᓕᕆᓂᕐᒧᑦ ᓄᓇᑦᓯᐊᕐᒥ, ᐅᓪᓗᒥ ᑕᐃᒪᓐᓇ ᓇᓗᓇᐃᖅᓯᖅᑲᐅᕗᑦ.

ᑲᑐᔾᔨᓪᓗᑎᒃ ᑮᓇᐅᔭᖃᖅᑎᑦᑎᓂᖏᑦᑎᒍᑦ ᐃᑲᔫᑕᐅᓂᐊᖅᐳᖅ ᐱᒋᐊᖅᑎᑕᐅᔪᒪᔪᖅ ᓄᓇᑦᓯᐊᑉ ᒐᕙᒪᒃᑯᖏᑦᑕ ᐃᖏᕐᕋᔾᔪᑎᓕᕆᔨᒃᑯᖏᓐᓄᑦ, ᑕᒪᓐᓇᓗ ᐃᑲᔫᑕᐅᓂᐊᖅᖢᓂ ᓇᓗᓇᐃᖅᓯᓇᓱᓕᖅᐸᑕ ᖃᔅᓯᕌᕋᔭᕐᒪᖔᖓ ᐊᕐᕌᒍᓕᒫᖅ ᐊᑐᖅᑕᐅᖃᑦᑕᕋᔭᖅᑐᒥᒃ ᐊᖅᑯᓯᐅᕈᑎᒃ ᒪᑲᓐᔨ ᕚᒥᐅ ᕆᒡᓕᖓᓂ ᑕᒻᔅᑐ ᐊᖅᑯᑎᕐᔪᐊᖓᓄᑦ ᐃᓅᕕᐅ ᖃᓂᒋᔮᓄᑦ.  ᑕᒪᓐᓇ ᐱᓕᕆᐊᖑᔪᒪᔪᖅ ᐊᕐᕌᒍᓄᑦ ᐱᖓᓱᓄᑦ ᓴᓇᔭᐅᓇᓱᖕᓂᐊᕋᓱᒋᔭᐅᔪᖅ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ $3 ᒥᓕᐊᓐᓂᒃ ᐃᓕᓯᓂᐊᖅᑐᑦ ᐊᕐᕌᒎᒃ ᒪᕐᕉᒃ ᓈᓇᓱᖕᓂᖏᓐᓂ ᐱᔭᕇᖅᑕᐅᔪᓐᓇᕐᓂᐊᕐᒪᑦ ᖃᔅᓯᕌᕐᓂᐊᕐᒪᖔᖓᓂᒃ ᖃᐅᔨᓴᕐᓂᖅ; ᓄᓇᑦᓯᐊᑉ ᒐᕙᒪᒃᑯᖏᑦ ᐃᓕᓯᓂᐊᖅᑐᑦ $4 ᒥᓕᐊᒃᑲᓐᓂᕐᓂᒃ ᐊᕐᕌᒍᑦ ᐱᖓᓱᑦ ᐊᓂᒍᕋᓱᖕᓂᖏᓐᓂ.  ᑕᒪᓐᓇ ᐱᓕᕆᐊᖑᓂᐊᖅᑐᖅ ᐅᐃᒍᒋᔭᐅᑐᐃᓐᓇᖅᑐᖅ ᒥᑭᓐᓂᖅᓴᓂᒃ ᑮᓇᐅᔭᖅᑐᕋᔭᓐᖑᐊᕐᓂᕐᓂᒃ ᖃᐅᔨᓴᐃᓚᐅᖅᓯᒪᓂᖏᓐᓄᑦ, ᑮᓇᐅᔭᖃᖅᑎᑕᐅᒋᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᓯᑎᐱᕆ 2009-ᖑᑎᓪᓗᒍ, ᖃᐅᔨᓴᐃᓪᓗᑎᒃ ᓴᓇᔪᓐᓇ3ᓂᐊᕐᒪᖔᕐᒥ ᐅᐊᖕᓇᖔᖓᒍᑦ ᐊᖅᑯᑎᕐᔪᐊᑉ ᐃᓅᕕᖕᒥᑦ ᑐᒃᑑᔭᖅᑑᕐᒧᑦ.

“ᐊᕐᕌᒍᓕᒫᖅ ᐊᑐᖅᑕᐅᖃᑦᑕᕈᓐᓇᖅᑐᒥᒃ ᐊᖅᑯᓯᐅᕈᑦᑕ ᒪᑲᓐᔨ ᕚᓕᒃᑰᖅᑐᒥᒃ ᐊᑐᖅᑕᐅᖏᓐᓇᐅᔭᕈᓐᓇᕋᔭᖅᑐᖅ ᑕᒪᒃᑯᓄᖓ ᐃᖏᕐᕋᔪᓄᑦ, ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᓐᓇ ᐊᖅᑯᑦ ᓴᓇᔭᐅᒃᐸᑦ ᒪᑲᓐᔨ ᕚᓕᒃᑰᖅᑐᖅ ᐱᕚᓪᓕᐅᑎᓪᓚᕆᐊᓘᔪᓐᓇᖅᑐᖅ ᑮᓇᐅᔭᓕᐅᕋᓱᐊᕈᑎᓄᑦ ᐊᒻᒪᓗ ᐃᖅᑲᓇᐃᔮᓂᒃ ᓴᖅᑭᑦᑎᔪᓐᓇᖅᖢᓂ, ᐊᑭᑭᓪᓕᒋᐊᒃᑲᓐᓂᕈᓐᓇᖅᖢᑎᒡᓗ ᐃᓅᔾᔪᑏᑦ ᐊᒻᒪᓗ ᐱᓯᓂᓯᖃᖅᑐᑦ, ᐊᑐᐃᓐᓇᐅᓂᖅᓴᐅᓕᕐᓗᑎᒡᓗ ᓄᓇᒥᐅᑕᐃᑦ ᕿᓂᕐᕕᐅᓂᐊᖅᑎᓪᓗᒋᑦ ᐱᓕᕆᐊᖑᓂᐊᖅᑎᓪᓗᒋᓪᓗ.  ᓂᕆᐅᒃᐳᒍᑦ ᖃᓄᐃᑦᑐᓂᒃ ᑐᑭᓯᒃᑲᓐᓂᐅᑎᑖᕐᓂᐊᕐᓂᑦᑎᓐᓂᒃ ᑖᒃᑯᑎᒎᓇᖅ ᐅᓂᒃᑳᓕᐊᕆᔭᐅᔪᒃᑯᑦ.

“ᑕᒪᓐᓇ ᐱᒋᐊᖅᑕᐅᔪᒪᔪᖅ ᐃᑲᔪᖅᓱᕈᑎᒍᑦ, ᒐᕙᒪᕗᑦ ᐃᑲᔪᖅᐳᑦ ᑐᓐᖓᕕᓕᐊᕆᔭᐅᑎᓪᓗᒍ ᓯᕗᓂᒃᓴᒥ ᑮᓇᐅᔭᓕᐅᕋᓱᐊᕐᓂᒃᑯᑦ ᖃᑭᕚᓪᓕᐅᑕᐅᓂᐊᖅᑐᓂᒃ ᑕᒫᓂ ᓄᓇᖃᖅᑐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᐅᔪᖅ ᐱᔭᒃᓴᖅᑖᖅᑎᑕᐅᓯᒪᓪᓗᓂ ᐅᑭᐅᖅᑕᖅᑐᓕᕆᓂᕐᒥᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂ.  “ᑕᐃᒃᑯᐊ ᐸᐃᑉᐹᑦ ᑲᑎᖅᓱᖅᑕᐅᔪᑦ ᑕᒪᑐᒧᖓ ᐱᕐᔪᐊᕐᒧᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᓂᐊᖅᑐᑦ ᓇᓗᓇᐃᖅᓯᔾᔪᑕᐅᓂᐊᖅᐳᑦ ᐊᖅᑯᓯᐅᕈᑎᒃ ᐊᕙᑎᑦᑎᓐᓄᑦ ᑮᓇᐅᔭᓕᐅᕋᓱᐊᕐᓂᒃᑯᓪᓗ ᐱᕚᓪᓕᐅᑕᐅᒃᑲᓐᓂᕈᓐᓇᕐᒪᖔᖏᑦ.”

"ᒪᑲᓐᔨ ᕚᓕᒃᑰᖅᑐᖅ ᐊᖅᑯᑎᕐᔪᐊᖅ ᐊᑯᓂᐊᓗᒃ ᓯᕗᓪᓕᐅᔾᔭᐅᓯᒪᓕᖅᑐᖅ ᓄᓇᑦᓯᐊᕐᒥᐅᑦ ᐃᓄᖁᑎᖏᓐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᓯᕗᓕᖅᑎ ᕗᓗᐃᑦ ᕉᓚᓐ.  “ᒐᕙᒪᐅᓪᓗᑕ, ᐅᓪᓗᒥ ᐊᖏᖅᓯᒪᕗᒍᑦ ᐃᑲᔪᖅᓱᐃᔪᒪᓂᕐᒥᒃ ᑐᓐᖓᕕᓕᐊᕆᔭᐅᔪᓂᒃ ᓴᖅᑭᑕᐅᔭᕆᐊᖃᖅᑐᓂᒃ, ᑕᒪᓐᓇ ᓯᕗᓪᓕᐅᔾᔭᐅᓯᒪᓂᖓ ᑲᔪᓯᔪᓐᓇᕐᓂᐊᕐᒪᑦ ᐊᒻᒪᓗ ᓯᕗᒧᐊᒃᐸᓪᓕᐊᓗᓂ, ᐱᖁᑎᕐᔪᐊᖅᑕᖃᐅᕆᐊᖃᕐᒪᑦ ᐃᓄᖁᑎᕗᑦ ᒪᑭᑉᐹᓪᓕᕈᓐᓇᕐᓂᐊᕐᒪᑕ ᐋᓐᓂᐊᖃᕐᓇᓐᖏᓐᓂᖅᓴᒧᑦ ᐊᒻᒪᓗ ᐃᓅᓯᖃᑦᑎᐊᕐᓂᖏᓐᓄᑦ, ᐊᒻᒪᓗ ᐱᕈᖅᐸ9ᓕᐊᔪᓐᓇᕐᓂᐊᕐᒪᑕ ᐆᒻᒪᕆᒃᓯᓗᑎᒡᓗ ᓄᓇᓕᖁᑎᕗᑦ."

“ᒪᑲᓐᔨ ᕚᓕᐅ ᐊᖅᑯᑎᕐᔪᐊᖓ, ᑮᓇᐅᔭᖃᖅᑎᑕᐅᓗᕈᓂ, ᖃᓄᖅ ᑕᐅᑦᑐᖃᕐᓂᐊᕐᓂᖓ ᐋᖅᑭᒃᑕᐅᒃᐸᑦ, ᐊᒻᒪᓗ ᐱᔭᕇᖅᑕᐅᒃᐸᑦ, ᒪᑐᐃᖅᓯᔾᔪᑎᓪᓚᕆᐅᓂᐊᖅᑐᖅ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐊᒻᒪᓗ ᐳᓚᕋᖅᑐᓕᕆᓂᕐᒥᒃ, ᒥᒃᖠᒋᐊᕐᓗᑎᒡᓗ ᐃᓅᓇᓱᐊᕐᓂᕐᒧᑦ ᑮᓇᐅᔭᖅᑐᕈᑏᑦ ᒪᑲᓐᔨ ᕚᓕᓕᒫᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᒪᐃᑯᓪ ᒪᒃᓚᐅᑦ.  “ᑖᓐᓇ ᐱᓕᕆᐊᑉ ᖃᓄᐃᑦᑑᓂᐊᕐᓂᖓᓄᑦ ᐅᓂᒃᑳᑦ ᑮᓇᐅᔭᖃᖅᑎᑕᐅᔪᑦ ᒐᕙᒪᑦᑎᓐᓄᑦ ᐅᓪᓗᒥ ᐊᒻᒪᓗ ᓇᓗᓇᐃᔭᐃᓯᒪᓂᐊᖅᖢᑎᒃ ᖃᓄᐃᑦᑐᓂᒃ ᐃᑲᔫᑎᑖᕐᓂᐊᕐᒪᑖᑦᑕ ᐱᔭᕆᐊᑦᑑᑎᓂᐊᕐᒪ…ᖔᑕᓗ ᑕᒪᓐᓇ ᐱᒻᒪᕆᐅᔪᖅ ᓯᕗᓪᓕᐅᔾᔭᐅᓯᒪᔪᖅ ᓯᕗᒧᐊᒃᑎᑕᐅᕙᓪᓕᐊᑎᓪᓗᒍ.”

ᓄᓇᑦᓯᐊᑉ ᒐᕙᒪᒃᑯᖏᑦᑕ ᐃᖏᕐᕋᔾᔪᑎᓕᕆᔨᖏᑦ ᑲᑐᔾᔭᐅᔪᓂᒃ ᑮᓇᐅᔭᓂᒃ ($3 ᒥᓕᐊᓐ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᑦ ᐊᒻᒪᓗ $4 ᒥᓕᐊᓐ ᓄᓇᑦᓯᐊᑉ ᒐᕙᒪᒃᑯᖏᓐᓂᑦ) ᐊᑐᕐᓂᐊᖅᑐᑦ ᐱᔭᕇᖅᑕᐅᔪᓐᓇᕐᓂᐊᕐᒪᑦ ᐱᓕᕆᐊᑉ ᖃᓄᐃᑦᑑᓂᖓᓄᑦ ᐅᓂᒃᑳᑦ.  ᑖᒃᑯᐊ ᐅᓂᒃᑳᑦ ᓇᓗᓇᐃᖅᓯᓂᐊᖅᑐᑦ ᖃᔅᓯᑐᕋᔭᓐᖑᐊᕐᓂᖏᓐᓂᒃ, ᐊᒃᑐᖅᑕᐅᓂᐊᖅᑐᓂᒃ, ᐃᑲᔫᑎᓂᒃ ᐊᒻᒪᓗ ᑭᓱᓂᒃ ᐊᑐᕆᐊᖃᕐᓂᐊᕐᒪᖔᑦ ᐊᖅᑯᓯᐅᖅᑎᓪᓗᒋᑦ ᐊᒻᒪᓗ ᒪᑭᒪᑦᑎᑎᓪᓗᒋᑦ ᐊᕐᕌᒍᓕᒫᖅ ᐊᑐᖅᑕᐅᔪᓐᓇᖅᑐᒥᒃ ᐊᖅᑯᒻᒥᒃ ᕆᒡᓕᒥᑦ ᑕᒻᔅᑑ ᐊᖅᑯᑎᕐᔪᐊᖓᓄᑦ.

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑖᒃᑯᐊ ᐱᒋᐊᖅᑎᑕᐅᔪᑦ ᐊᑐᐃᓐᓇᕈᖅᑎᑕᐅᓯᒪᕗᑦ ᑲᓇᑕᐅ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖅᑎᒍᑦ, ᐃᓚᒋᔭᐅᖃᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓄᑦ.  ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᕐᕌᒎᖕᓄᑦ ᒪᕐᕉᖕᓄᑦ ᐊᑐᖅᑐᒃᓴᓐᖑᖅᑎᑕᐅᕗᑦ $1 ᐱᓕᐊᓐᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ, ᐊᒻᒪᓗ ᑮᓇᐅᔭᓕᐅᕋᓱᐊᕈᑕᐅᓂᐊᖅᖢᑎᒃ ᓴᖅᑭᑦᑎᓂᐊᖅᑐᓂᒃ ᐃᖅᑲᓇᐃᔮᒃᓴᓂᒃ ᓄᓇᓕᖕᓂ ᐊᒃᑐᖅᑕᐅᓯᒪᓗᐊᓐᖑᐊᖅᑐᓂᒃ ᓄᓇᕐᔪᐊᕐᒥ ᑮᓇᐅᔭᑦ ᑲᑕᐅᒥᓯᒪᑎᓪᓗᒋᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᑦ ᐊᒻᒪᓗ ᐊᕙᑎᒧᑦ ᐃᑲᔫᑏᑦ ᑮᓇᐅᔭᖃᖅᑎᑕᐅᔪᓐᓇᕐᒪᖔᑦ ᐃᓱᒪᒃᓴᖅᓯᐅᕈᑕᐅᖃᑦᑕᕐᒥᔪᑦ.  ᑮᓇᐅᔭᑦ $32.8 ᒥᓕᐊᓐᓂᒃ ᐊᑐᐃᓐᓇᕈᐃᓂᐊᖅᑐᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓄᑦ 2009 ᐊᒻᒪᓗ 2011 ᐊᑯᓐᓂᖓᓂ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᕗᑦ, ᐱᔭᒃᓴᖅᑖᕆᔭᐅᓯᒪᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑎᖏᓐᓄᑦ ᓄᓇᕗᒻᒥ, ᓄᓇᑦᓯᐊᕐᒥ ᐊᒻᒪᓗ ᔫᑳᓐᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᖅᑎᑦᑎᓂᕐᒥᒃ ᓴᖅᑭᑎᑦᑎᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᖏᓐᓂᒃ ᐅᑭᐅᖅᑕᖅᑑᑉ ᒐᕙᒪᖃᕐᕕᖏᓐᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᐃᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ: http://www.north.gc.ca/index-eng.asp

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ (ᓄᓇᑦᓯᐊᕐᒥ ᐊᕕᒃᑐᖅᓯᒪᔪᑦ 
ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(867) 669-2580
Petra.White@cannor.gc.ca

ᓯᕗᓕᖅᑎ ᕗᓗᐃᑦ ᕉᓚᐅ ᑎᑎᕋᕐᕕᖓ
ᑐᕉ ᐅᐃᓕᐊᒻᔅ
ᓯᕗᓕᖅᑎᐅ/ᒥᓂᔅᑕᐃᑦ ᑲᑎᒪᔨᖏᓐᓄᑦ ᐱᕙᓪᓕᐊᔪᓕᕆᔨ
ᓄᓇᑦᓯᐊᑉ ᒐᕙᒪᒃᑯᖏᓐᓄᑦ
ᐅᖄᓚᐅᑖ (867) 669-2304