ᑲᓇᑕ ᐃᑲᔪᖅᓱᐃᕗᖅ ᕚᕈᓪ, ᔫᑳᓐ ᑲᔾᔭᕐᓇᖅᓴᐃᓂᖓᓂᒃ

CanNor-09-18

ᕙᐃᑦᕼᐅᐊᔅ, ᔫᑳᓐ (ᑎᓯᐱᕆ 15, 2009) –ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᔫᑳᓐ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑕᐅᓂᐊᕐᓂᖏᓐᓂᒃ ᑲᔾᔮᕐᓇᖅᓴᖅᑕᐅᔪᓐᓇᕐᓂᐊᕐᒪᑦ ᓄᑖᓐᖑᕆᐊᖅᑎᑕᐅᒃᑲᓐᓂᕐᓂᐊᕐᒪᓪᓗ ᕚᕈ, ᔫᑳᓐ.  ᑕᒪᓐᓇ ᐱᒋᐊᖅᑎᑕᐅᔪᓐᓇᖅᓯᓚᐅᖅᑐᖅ ᐊᑐᖅᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᐊᒻᒪᓗ ᐃᑲᔪᖅᓱᐃᔾᔪᑕᐅᓪᓗᑎᒃ ᕚᕈᓪ ᑕᐅᓐᑯᖏᑦᑕ ᑲᑎᓐᖓᔪᓂᒃ ᓄᓇᓕᖕᓂ ᒪᑭᑉᐹᓪᓕᐅᑎᒃᓴᖏᑦᑕ ᐸᕐᓇᐅᑎᖏᓐᓂᒃ.

“ᑖᓐᓇ ᐱᓕᕆᐊᖑᔪᒪᔪᖅ ᕚᕉᑉ ᓄᓇᖓᓄᑦ ᐳᓛᕆᐊᕈᒥᓇᖅᓯᑎᑦᑎᔾᔪᑕᐅᓂᐊᖅᑐᖅ, ᓴᖅᑭᔮᖅᑎᑦᑎᒃᑲᓐᓂᕐᓗᑎᒡᓗ ᐊᕗᖓᐅᔨᓯᒪᔪᓂᒃ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᓂᒃ ᐊᒻᒪᓗ ᐃᑲᔪᖅᓱᐃᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᑕ ᑐᑭᒧᐊᕈᑎᒃᓴᓕᐊᖏᓐᓂᒃ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ. “ᑖᓐᓇ ᐱᓕᕆᐊᖅ ᑐᑦᑕᕐᕕᒋᔭᐅᓂᐊᖅᑐᖅ ᓄᓇᓖᑦ ᑲᔾᔮᕐᓇᖅᓴᖅᑕᐅᓂᐊᕐᓂᖏᑦᑕ ᐸᕐᓇᐅᑎᖏᓐᓄᑦ ᐊᒻᒪᓗ ᐅᑭᐅᖅᑕᖅᑐᒥᐅᓄᑦ ᐃᖅᑲᓇᐃᔮᒃᓴᓂᒃ ᓄᐃᑦᑎᔾᔪᑕᐅᓂᐊᖅᖢᓂ.”

“ᑖᓐᓇ ᐱᓕᕆᐊᖅ ᑲᔪᖏᖅᓴᐅᑕᐅᓂᐊᖅᑐᖅ ᓯᕗᓂᒃᓴᒥ ᑮᓇᐅᔭᓂᒃ ᓴᒡᕙᐃᔪᒥᓇᕐᓂᕐᒥᒃ ᔫᑳᓐ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖏᓐᓄᑦ ᐊᒻᒪᓗ ᐃᑲᔪᖅᓱᐃᓪᓗᓂ ᕚᕉᑉ ᒪᕐᕈᓪᓗᐊᑖᒃ ᐱᖁᑎᓪᓚᕆᖏᓐᓂᒃ - ᓄᓇᖓᑕ ᑲᔾᔮᕐᓇᖅᑐᐊᓘᓂᖓᓄᑦ ᐊᒻᒪᓗ ᐃᓄᐃᓪᓚᒧᒐᕐᓂᕐᓂᖓ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒥᒃ ᐱᔭᒃᓴᖅᑖᖅᑎᑕᐅᓯᒪᔪᖅ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕᕆᔭᐅᔪᖅ.   

“ᔫᑳᓐ ᒐᕙᒪᒃᑯᑦ ᖁᕕᐊᑦᑐᑦ ᐃᑲᔪᕈᓐᓇᕋᒥᒃ ᕚᕉᑉ ᓄᓇᖓᓂᒃ ᑕᒪᓐᓇ ᐱᓕᕆᐊᖑᑎᓪᓗᒍ ᐊᒻᒪᓗ ᐃᑲᔪᖅᓱᐃᖏᓐᓇᕐᓂᐊᖅᐳᒍᑦ ᐱᒋᐊᖅᑎᑦᑎᓇᓱᒃᑎᓪᓗᒋᑦ ᒪᑭᒪᑦᑎᐊᕐᓂᖅᓴᐅᓕᕈᓐᓇᕐᓂᐊᕐᒪᑕ ᐆᒻᒪᕆᖕᓂᖅᓴᐅᓕᕈᓐᓇᕐᓂᐊᕐᒪᑕᓗ ᔫᑳᓐᒥᐅᑦ ᓄᓇᓕᖁᑎᖏᑦ,: ᑕᐃᒪᓐᓇ ᐅᖃᓚᐅᖅᑐᖅ ᐋᑦᓯ ᓛᖕ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐆᒻᒪᖅᑯᑎᓕᕆᓂᕐᒥᒃ, ᐅᔭᕋᖕᓂᐊᕐᕕᓕᕆᓂᕐᒥᒃ ᐊᒻᒪᓗ ᓄᓇᒥᐅᑕᓕᕆᓂᕐᒥᒃ ᐊᒻᒪᓗ ᓄᓇᓕᖕᓂ ᐱᔨᑦᑎᕈᑎᓄᑦ.  “ᑖᓐᓇ ᐱᓕᕆᐊᖅ ᓴᖅᑭᑦᑎᒃᑲᓐᓂᕈᑕᐅᓂᐊᖅᐳᖅ ᒪᑭᒪᔪᓐᓇᕐᓂᖅᓴᐅᓕᕈᓐᓇᕐᓂᐊᕐᒪᑦ ᓄᓇᖓ ᓯᕗᓂᒃᓴᑦᑎᓐᓂ.”

“ᕚᕈ ᓄᓇᓕᐅᕗᖅ ᐊᖏᖅᓯᒪᑦᑎᐊᖅᖢᓂ ᑲᔾᔮᕐᓇᖅᓴᐃᓂᕐᒥᒃ ᐊᒻᒪᓗ ᒪᑭᒪᔾᔪᑎᒃᓴᖅᓯᐅᕐᓂᕐᒥᒃ.  ᑖᓐᓇ ᐱᓕᕆᐊᖅ ᐃᑲᔫᑕᐅᓂᐊᖅᑐᖅ ᐊᒃᓱᕉᑎᒋᔭᑦᑎᓐᓄᑦ, ᓄᓇᑖᕈᒪᔪᑦ ᖃᐃᓂᐊᕐᒪᑕ ᐃᓄᐃᑦ/ᐱᓯᓂᓯᖃᕐᕖᑦ, ᐳᓛᕆᐊᖅᑐᕕᓃᑦ ᐅᑎᒃᑲᓐᓂᖃᑦᑕᕐᓂᐊᕐᓂᖏᑦ, ᐊᒻᒪᓗ ᑕᖅᑲᒃᑯᓄᖓ ᐊᑦᑕᓇᓐᖏᓐᓂᖅᓴᐅᓕᕐᓗᓂ ᓄᓇᖓ,” ᑕᐃᒪᓐᓇ ᐅᖃᓚᐅᖅᑐᖅ ᕼᐊᑐ ᑳᒻᐳᓪ, ᒪᐃᔭᒋᔭᐅᔪᖅ ᕚᕉ ᓄᓇᖓᓄᑦ.  “ᐃᖅᑲᓇᐃᔭᖃᑎᒋᓗᑎᒃᑯᑦ ᔫᑳᓐ ᒐᕙᒪᖏᑦ ᐊᒻᒪᓗ ᑲᓇᑕᐅᑉ ᒐᕙᒪᖏᑦ ᐱᕚᓪᓕᐅᑎᒋᓂᐊᖅᑕᕗᑦ, ᓯᕗᒧᐊᒃᐸᓪᓕᐊᑎᑕᐅᔪᓐᓇᕐᓂᐊᕐᒪᑕ ᓄᓇᑦᑕ ᐃᓗᐊᓂ ᑲᔾᔮᕐᓇᖅᓴᐅᑏᑦ.”

ᑖᓐᓇ ᐱᓕᕆᐊᖅ ᐊᖅᑯᑕᐅᓗᓂ ᐲᔭᐃᓂᐊᖅᑐᑦ ᑕᓪᓕᒪᓂᒃ ᐊᑐᖅᑕᐅᖃᑦᑕᓐᖏᑦᑐᓂᒃ ᓄᑕᐅᔪᓐᓃᖅᑐᓂᒃ ᐃᒡᓗᕐᔪᐊᕐᓂᒃ, ᑕᒪᓐᓇ ᕚᕉ ᓄᓇᓕᖁᑖᑕ ᑐᕌᒐᓕᐊᕆᓯᒪᖕᒪᒍ ᑲᑎᓐᖓᔪᓂᒃ ᓄᓇᓕᖕᓂ ᒪᑭᑉᐹᓪᓕᐅᑎᒃᓴᖏᑦᑕ ᐸᕐᓇᐅᑎᖏᓐᓂᒃ, ᓄᓇᓕᐅᑉ ᐃᓗᐊᓃᑦᑐᖅ ᑲᔾᔮᕐᓇᖅᓴᕐᓗᒍ ᖁᕕᐊᒋᔭᐅᖃᑦᑕᕐᓂᐊᕐᒪᑦ ᓄᓇᖃᖅᑐᓄᑦ ᐊᒻᒪᓗ ᐳᓛᕆᐊᖅᑐᓄᑦ, ᐊᒻᒪᓗ ᐃᑲᔪᖅᓲᑕᐅᓂᐊᖅᖢᓂ ᕚᕉᑉ ᒪᑭᒃᑲᓐᓂᕈᓐᓇᕐᓂᖓᓄᑦ ᑮᓇᐅᔭᓂᒃ ᓴᒡᕙᐃᓂᒃᑯᑦ ᐳᓚᕋᖅᑐᓕᕆᓂᕐᒨᖓᔪᓄᑦ.  ᔫᑳᓐ ᒐᕙᒪᒃᑯᖏᑦ $700,000-ᓂᒃ ᑮᓇᐅᔭᖅᑖᕐᓂᐊᖅᑐᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᓂᒃ, ᐲᔭᖅᑕᐅᓗᑎᒡᓗ ᐃᒡᓗᕐᔪᐊᑦ ᐊᑐᓐᖏᑦᑐᑐᖃᑦ ᑭᒡᒐᖅᑐᖅᑕᐅᓗᑎᒃ ᕚᕉᑉ ᑕᐅᓐᖓ.

ᑖᒃᑯᐊ ᐃᓚᒋᔭᐅᖃᑕᐅᓪᓗᑎᒃ ᑮᓇᐅᔭᖃᖅᑎᑕᐅᓂᐊᖅᑐᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᐊᖅᑯᑎᒋᔭᐅᓪᓗᑎᒃ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕋᓱᐊᕈᑏᑦ ᐊᒻᒪᓗ ᐊᕙᑎᒧᑦ ᐃᑲᔫᑏᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᒪᑐᒨᓇ.  ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᑮᓇᐅᔭᑦ ᐊᑐᐃᓐᓇᕈᖅᑕᐅᓂᐊᕐᓂᖏᑦ $32.8 ᒥᓕᐊᓐᖏᓐᓃᑦᑐᑦ ᐱᖓᓱᓄᑦ ᐅᑭᐅᑕᖅᑐᒥ ᒐᕙᒪᖃᕐᕕᓕᖕᓄᑦ 2009-ᒥᑦ 2011-ᒧᑦ ᑎᑭᓪᓗᒍ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᓕᕆᐊᓐᖑᖅᑎᑕᐅᓯᒪᔪᓄᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐱᔭᒃᓴᖅᑖᕆᓯᒪᓪᓗᓂᔾᔪᒃ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ. 

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐊᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ
ᑳᑦᓖᓐ ᒪᒃᓚᐅᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᑦ ᐊᖓᔪᖅᑳᖓᑦ
613-995-7766

ᓄᓇᓕᖕᓂ ᐱᔨᑦᑎᖅᑏᑦ, ᔫᑳᓐ ᒐᕙᒪᒃᑯᖏᑦ
ᒫᑦ ᑭᖕ
ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐅᖄᓚᐅᑖ: (867) 456-6580

ᕙᐅᕉ ᑕᐅᓐᖓ
ᕼᐊᑐ ᑳᒻᐳᓪ, ᒪᐃᔭᒋᔭᐅᔪᖅ ᕙᐅᕉᓪᒧᑦ
(867) 994-2728