ᑲᓇᑕᐅᑉ ᒐᕙᒪᒃᑯᑦ ᑮᓇᐅᔭᖅᑖᖅᑎᑦᑎᕗᑦ ᓇᐹᖅᑐᖃᕐᕕᖕᒥ ᐱᓕᕆᐊᖑᔪᓂᒃ ᓄᓇᑦᓯᐊᕐᒥᐅᑦ ᓄᓇᓕᖁᑎᖏᑦ ᐊᑦᑕᓇᓐᖏᓐᓂᖅᓴᒦᑦᑐᓐᓇᕐᓂᐊᕐᒪᑕ

CanNor-09-17

ᔭᓗᓇᐃᕝ  (ᓄᕕᐱᕆ 30, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖅᑖᖅᑎᑦᑎᓂᐊᕐᓂᕐᒥᖕᓂᒃ ᓄᓇᑦᓯᐊᕐᒥᐅᑦ ᐃᑲᔪᕈᓐᓇᕐᓂᐊᕐᒪᑕ 14-ᓂᒃ ᓄᓇᓕᖕᓂᒃ, ᓇᐹᖅᑐᖃᕐᕖᑦ ᐃᑯᐊᓚᔪᐊᓘᓕᖅᑎᓪᓗᒋᑦ ᓴᐳᒻᒥᐅᓯᖅᑕᐅᓯᒪᓂᖅᓴᐅᖁᓪᓗᒋᑦ.

“ᑕᒪᓐᓇ ᐱᒻᒪᕆᐅᔪᖅ ᐊᖅᑯᑎᒋᔭᐅᓗᓂ, ᓄᓇᑦᓯᐊᕐᒥᐅᑦ ᓄᓇᓕᖁᑎᖏᑦ ᐊᑦᑕᓇᔾᔭᐃᖅᓯᒪᓂᖅᓴᐅᓂᐊᖅᑐᑦ ᐊᒻᒪᓗ ᓴᐳᒻᒥᐅᓯᖅᑕᐅᓯᒪᓂᐊᖅᖢᑎᒃ ᓇᐹᖅᑐᖃᕐᕖᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᓐᓇ ᐊᖅᑯᑎᒋᔭᐅᓗᓂ ᐅᑭᐅᖅᑕᖅᑐᒥ ᓄᓇᓖᑦ ᐊᒻᒪᓗ ᓇᐹᖅᑐᖃᕐᕖᑦ ᓴᐳᒻᒥᐅᓯᖅᑕᐅᓯᒪᑐᐃᓐᓇᔾᔮᓐᖏᑦᑐᑦ, ᓴᖅᑭᑦᑎᖃᓯᐅᔾᔨᓂᐊᕐᒪᑦ ᐃᖅᑲᓇᐃᔮᒃᓴᓂᒃ ᓴᖅᑭᑕᐅᔭᕆᐊᖃᓪᓚᕆᒃᑐᓂᒃ ᐊᒻᒪᓗ ᐱᓕᒻᒪᒃᓴᐅᑕᐅᓂᐊᖅᖢᓂ ᐊᔪᕈᓐᓃᖅᐸᓪᓕᐊᔾᔪᑕᐅᓂᐊᖅᖢᓂᓗ ᓄᓇᓕᖕᓂᕐᒥᐅᑕᐅᔪᓂᒃ.

“ᑕᒪᓐᓇ ᐱᒋᐊᖅᑎᑕᐅᔪᖅ ᐆᒃᑑᑎᑦᑎᐊᕙᐅᕗᖅ ᑭᓱᓂᑦ ᑲᔪᓯᑎᑕᐅᔪᓐᓇᕐᒪᖔᖏᑦ ᓄᓇᓖᑦ ᐊᒻᒪᓗ ᒐᕙᒪᐃᑦ ᐃᖅᑲᓇᐃᔭᖃᑎᒌᒃᑳᖓᑕ ᐱᕚᓪᓕᐅᑕᐅᒃᑲᓐᓂᕈᓐᓇᕐᓂᐊᕐᒪᑕ ᐅᑭᐅᖅᑕᖅᑐᒥᐅᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒥᒃ ᐱᔭᒃᓴᖅᑖᖅᑎᑕᐅᓯᒪᔪᖅ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕ.

ᑕᒪᑐᒧᖓ ᐃᓚᐅᔪᑦ ᓄᓇᓖᑦ ᐋᖅᑭᒃᓱᐃᓂᐊᖅᑐᑦ ᓄᓇᓕᖕᓂ ᓇᐹᖅᑐᖃᕐᕖᑦ ᐃᑯᐊᓪᓚᒃᑎᑕᐅᑦᑕᐃᓕᒪᔾᔪᑎᖏᑦᑕ ᐸᕐᓇᐅᑎᖏᓐᓂᒃ ᐊᒻᒪᓗ ᓇᐹᖅᑐᓂᒃ ᕿᔪᒃᓴᖃᕐᓂᕐᒥᒃ ᐊᑐᓐᖏᒃᑲᓐᓂᐅᑎᒃᓴᖏᓐᓂᒃ, ᐃᓚᓕᐅᓪᓗᒍ ᓇᐹᖅᑐᓛᑦ ᓇᑲᑎᖅᑕᐅᓂᖏᑦ ᐊᒻᒪᓗ ᓇᐹᖅᑐᐃᔭᐃᓂᖅ, ᐃᖅᑲᓇᐃᔭᖅᑎᑦᑎᓂᐊᖅᖢᑎᒡᓗ 100-ᖏᓐᓃᑦᑐᓂᒃ ᐃᓄᖕᓂᒃ ᒫᔾᔨ 2010-ᖑᕋᓱᖕᓂᖓᓄᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕈᖅᑐᓄᓪᓗ ᐃᑲᔫᑏᑦ ᓴᖅᑭᑦᑎᓐᓂᐊᕋᓱᒋᔭᐅᖕᒥᔪᑦ ᓇᐹᖅᑐᐃᑦ ᐃᑯᐊᓛᕐᓂᖏᓐᓄᑦ ᐅᓗᕆᐊᓇᓐᖏᓐᓂᖅᓴᐅᓕᖅᑎᑦᑎᓂᒃᑰᖅᑐᑦ ᓄᓇᓕᖕᓄᑦ ᐊᒻᒪᓗ ᓇᐹᖅᑐᖃᕐᕕᖕᓄᑦ.

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑲᑎᓪᓗᒋᑦ $1.2 ᒥᓕᐊᓐᖑᓂᐊᖅᑐᑦ ᑕᒪᑐᒧᖓ ᐊᑐᖅᑐᒃᓴᑦ ᐊᒻᒪᓗ ᑲᑎᓕᒫᕐᓗᒋᑦ ᑮᓇᐅᔭᖅᑐᕈᑕᐅᓂᐊᖅᑐᑦ 97 ᐳᓴᓐᑎᖏᓐᓃᑦᑐᑦ ᑖᒃᑯᓄᖓ ᐊᑭᓕᐅᑕᐅᓂᐊᖅᖢᑎᒃ.  ᓄᓇᑦᓯᐊᑉ ᒐᕙᒪᒃᑯᖏᑦᑕ ᐊᕙᑎᓕᕆᔨᒃᑯᖏᑦ ᓄᓇᒥᐅᑕᓕᕆᔨᒃᑯᓪᓗ ᐃᓕᓯᒃᑲᓐᓂᕐᓂᐊᖅᑐᑦ $40,000-ᓂᒃ ᐃᖅᑲᓇᐃᔭᖅᑎᒃᓴᐅᓂᐊᖅᑐᓄᑦ ᐊᑐᖅᑕᐅᓂᐊᖅᑐᓂᒃ ᐊᑐᓕᖅᑎᑦᑎᕙᓪᓕᐊᓕᖅᑎᓪᓗᒋᑦ ᐊᒻᒪᓗ ᐃᓚᖃᕐᓗᑎᒃ ᐋᖅᑭᒃᓱᐃᓂᖅ ᑎᓴᒪᓂᒃ ᓄᓇᓕᖕᓂ ᐃᑯᐊᓪᓚᒃᑎᑕᐅᑦᑕᐃᓕᒪᔾᔪᑎᖏᑦᑕ ᐸᕐᓇᐅᑎᓂᒃ.

ᓄᓇᓕᖕᓂ ᐃᑯᐊᓪᓚᒃᑎᑕᐅᑦᑕᐃᓕᒪᔾᔪᑎᖏᑦᑕ ᐸᕐᓇᐅᑎᓕᐅᕐᓂᖅ ᐊᑑᑎᖃᑦᑎᐊᕐᓂᖅᓴᒃᑯᑦ ᐊᑐᕈᓐᓇᕐᓂᐊᖅᑕᕗᑦ ᒫᓐᓇ ᐊᑐᖅᑕᕗᑦ ᖃᑦᑎᕆᔾᔪᑏᑦ, ᐊᒻᒪᓗ ᓴᓇᕐᕈᑎᖃᐅᕐᓂᖅᓴᐅᓂᐊᖅᖢᑕ ᐊᐅᓚᑕᐅᑦᑎᐊᕈᓐᓇᕐᓂᐊᕐᒪᑕ ᓇᐹᖅᑐᖃᕐᕖᑦ”, ᑕᐃᒪᓐᓇ ᐅᖃᓚᐅᖅᑐᖅ ᓄᓇᑦᓯᐊᑉ ᒐᕙᒪᒃᖏᑦᑕ ᒥᓂᔅᑕᖓ ᐊᕙᑎᓕᕆᓂᕐᒧᑦ ᓄᓇᒥᐅᑕᓕᕆᓂᕐᒧᓪᓗ, ᒪᐃᑯᓪ ᒥᐅᓪᑕᓐᐴᒍ.  “ᖁᕕᐊᓱᒃᑐᖓ ᑖᒃᑯᐊ ᑮᓇᐅᔭᑦ ᑕᒪᑐᒧᖓ ᐱᒻᒪᕆᐅᔪᒧᑦ ᐊᑐᖅᑕᐅᓂᐊᕐᒪᑕ.”

ᑕᒪᑐᒧᖓ ᐊᑐᖅᑐᒃᓴᑦ ᑮᓇᐅᔭᑦ ᐊᑐᐃᓐᓇᕈᖅᑎᑕᐅᓂᐊᖅᑐᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖁᑎᓂᓐᖔᖅᑐᑦ, ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ.  ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᕐᕌᒎᖕᓄᑦ ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ; ᑖᒃᑯᐊ ᑮᓇᐅᔭᖃᖅᑎᑦᑎᓂᐊᖅᑐᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓃᑦᑐᓄᑦ ᐱᖓᓱᓄᑦ ᒐᕙᒪᖃᕐᕕᓕᖕᓄᑦ 2009-ᒥᑦ 2011-ᒧᑦ ᑎᑭᓪᓗᒍ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᑐᖅᑕᐅᔪᓐᓇᖅᑐᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐃᖅᑲᓇᐃᔮᖅᑖᕆᓯᒪᓪᓗᓂᐅᒃ ᓄᓇᑦᓯᐊᕐᒧᑦ, ᔫᑳᓐᒧᑦ ᐊᒻᒪᓗ ᓄᓇᕗᒻᒧᑦ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓂ. 

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ: http://www.north.gc.ca/index-eng.asp

ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓂᒃ ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕘᓇ ᑕᑯᒋᐊᕈᓐᓇᖅᑕᑎᑦ ᐊᒻᒪᓗ ᑐᑭᓯᒋᐊᒃᑲᓐᓂᕈᒪᒍᕕᑦ ᑲᓇᑕᐅᑉ ᐅᑭᐅᑕᖅᑐᖓᓂ ᑐᑭᒧᐊᕈᑎᖏᑦ, ᐅᕘᓇ ᑕᑯᒋᐊᕈᓐᓇᖅᑕᑎᑦ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨᑦ ᐊᖓᔪᖅᑳᖓᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ, ᓄᓇᑦᓯᐊᕐᒧᑦ
ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨᑦ ᐊᖓᔪᖅᑳᖓᑦ
(867) 669-2580