ᑲᓇᑕᐅᑉ ᒐᕙᒪᒃᑯᖏᑦ, ᔫᑳᓐ ᒐᕙᒪᒃᑯᖏᑦ ᐊᒻᒪᓗ ᓄᓇᓖᑦ ᐃᑲᔪᖅᓱᐃᕗᑦ ᔫᑳᓐᒥ ᐱᓐᖑᐊᕐᕖᑦ ᓄᑖᓐᖑᕆᐊᖅᑎᑕᐅᓂᐊᕐᓂᖏᓐᓂᒃ

CanNor-09-16

ᕙᐃᑦᕼᐅᐊᔅ, ᔫᑳᓐ (ᓄᕕᐱᕆ 27, 2009) – ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐊᒻᒪᓗ ᐋᑦᓯ ᓛᖕ, ᔫᑳᓐᒥ ᒥᓂᔅᑕᕆᔭᐅᔪᖅ ᓄᓇᓕᖕᓂ ᐱᔨᑦᑎᕐᓂᕐᒧᑦ, ᐅᓪᓗᒥ ᓇᓗᓇᐃᖅᓯᖅᑲᐅᕘᒃ ᑮᓇᐅᔭᖅᑖᖅᑎᑦᑎᓂᐊᕐᓂᕐᒥᖕᓂᒃ 7 ᐱᓐᖑᐊᕐᕖᑦ ᔫᑳᓐᒦᑦᑐᑦ ᓄᑖᓐᖑᕆᐊᖅᑎᑕᐅᓂᐊᕐᓂᖏᓐᓄᑦ ᐊᑐᖅᑐᒃᓴᓂᒃ.  ᑕᒪᓐᓇ ᐱᒋᐊᖅᑎᑕᐅᔪᖅ ᑲᔪᓯᔪᓐᓇᖅᓯᑎᑕᐅᔪᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ.

“ᑕᒪᒃᑯᐊ ᐱᓐᖑᐊᕐᕖᑦ ᓄᑖᓐᖑᕆᐊᖅᑎᑕᐅᒃᐸᑕ ᐃᓅᓯᖃᑦᑎᐊᕐᓂᕐᒧᑦ ᐱᕚᓪᓕᐅᑕᐅᓂᐊᖅᑐᖅ ᐊᒻᒪᓗ ᐃᖃᐃᔭᕐᓂᖅᓴᐅᓕᕐᓗᑎᒃ ᔫᑳᓐᒥᐅᑦ ᐃᓚᔮᕇᖁᑎᖏᑦ ᓄᓇᓕᖁᑎᖏᓪᓗ,” ᑕᐃᒪᓐᓇ ᐅᖃᓚᐅᖅᑐᖅ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᒃᑯᐊ ᐱᓐᖑᐊᕐᕖᑦ ᑐᑦᑕᕐᕕᒋᔭᐅᓪᓚᕆᒃᐳᑦ ᓄᓇᓕᖕᓄᑦ, ᐊᑦᑕᓇᓐᖏᑦᑐᒥᓗ ᑲᑎᕝᕕᐅᖃᑦᑕᖅᖢᑎᒃ, ᐱᓐᖑᐊᕐᕕᐅᖃᑦᑕᖅᖢᑎᒃ ᐊᒻᒪᓗ ᐃᖃᐃᔭᕐᕕᐅᖃᑦᑕᖅᖢᑎᒃ.”

“ᓄᓇᓕᖕᓂᒃ ᑮᓇᐅᔭᖃᖅᑎᑦᑎᓂᖅ ᐊᒃᑐᐃᓂᖃᓪᓚᕆᖃᑦᑕᖅᐳᖅ ᐃᓄᐃᑦ ᐃᓅᓯᖏᓐᓂᒃ ᓄᓇᖃᖅᑐᓂᒃ ᐊᒻᒪᓗ ᐃᖅᑲᓇᐃᔭᕆᐊᖅᓯᒪᔪᓂᒃ ᐅᑭᐅᖅᑕᖅᑐᒥ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᐅᔪᖅ ᐱᔭᒃᓴᖅᑖᖅᑎᑕᐅᓯᒪᓪᓗᓂ ᐅᑭᐅᖅᑕᖅᑐᓕᕆᓂᕐᒥᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂ. “ᑕᒪᒃᑯᐊ ᐱᓐᖑᐊᕐᕖᑦ ᐊᖅᑯᑎᒋᔭᐅᓪᓗᑎᒃ ᐊᑐᓪᓚᕆᒃᑐᒥᒃ ᐱᖁᑎᕐᔪᐊᓂᒃ ᐊᑐᐃᓐᓇᐃᑎᑦᑎᕗᑦ.  ᐅᑭᐅᑕᖅᑐᒥᐅᑦ ᒪᒃᑯᒃᑐᖁᑎᖏᑦ ᐃᑲᔫᓯᐊᕐᓂᐊᖅᑐᑦ ᑖᒃᑯᓇᓐᖓᑦ ᓄᑖᓐᖑᕆᐊᖅᑎᑕᐅᔪᓂᑦ ᐊᕐᕌᒍᒐᓴᖕᓄᑦ ᐊᒡᒋᖅᑐᓄᑦ.”

ᐱᓐᖑᐊᕐᕖᑦ ᐱᓗᐊᓐᖑᐊᖅᖢᑎᒃ ᐱᒻᒪᕆᐅᕗᑦ ᐊᒥᓱᓂ ᐅᑭᐅᑕᖅᑐᒦᑦᑐᓂ ᓄᓇᓕᖕᓂ, ᐃᖃᐃᔭᕐᕕᐅᖃᑦᑕᕐᒪᑕ ᐊᒻᒪᓗ ᐱᓐᖑᐊᕐᕕᐅᓪᓗᑎᒃ, ᑭᒃᑯᑐᐃᓐᓇᕐᓄᓪᓗ ᐃᓕᓐᓂᐊᕐᕕᖕᓄᑦ ᐱᓐᖑᐊᕐᕕᐅᓪᓗᑎᒃ, ᓂᕈᐊᕆᐊᖅᑐᕐᕕᐅᓪᓗᑎᒃ, ᐊᒻᒪᓗ ᐊᔾᔨᒌᓐᖏᑦᑐᓄᑦ ᑲᑎᕝᕕᐅᖃᑦᑕᖅᖢᑎᒃ ᐃᓄᓕᒫᓄᑦ ᖁᕕᐊᓲᑎᖃᖅᑐᓄᑦ.  ᐱᐅᓂᖅᓴᓂᒃ ᐱᓐᖑᐊᕐᕕᖃᓕᕈᑦᑕ ᐃᑲᔫᑕᐅᓂᐊᕐᒥᔪᖅ ᑮᓇᐅᔭᓕᐅᕋᓱᐊᕐᓂᕐᒥᒃ ᓄᓇᓕᖕᓂ.  ᐱᓕᕆᐊᖑᔪᑦ ᐅᑯᑎᒎᓈᖅᑎᑕᐅᔪᑦ ᐅᓂᒃᑲᐅᓯᕆᔭᐅᓯᒪᖕᒥᔪᑦ ᐱᒋᐊᕐᓂᕕᓂᖏᑦᑕ ᐅᓂᒃᑳᖏᓐᓂ.

“ᔫᑳᓐ ᒐᕙᒪᖏᑦ ᐊᒃᓱᐊᓗᒃ ᖁᕕᐊᓱᒃᐳᑦ ᐃᖅᑲᓇᐃᔭᖃᑎᖃᕈᓐᓇᕋᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᒃ ᐊᒻᒪᓗ ᓄᓇᓕᖕᓂᒃ, ᑮᓇᐅᔭᓕᐅᕋᓱᐊᓐᖏᑦᑐᑦ ᑎᒥᖁᑎᖏᓐᓂᒃ ᐊᒻᒪᓗ ᐃᖅᑭᓕᖕᓂᒃ,” ᓄᓇᓕᖕᓂ ᐱᔨᑦᑎᕐᓂᕐᒧᑦ ᒥᓂᔅᑕ ᐋᑦᓯ ᓛᖕ ᑕᐃᒪᓐᓇ ᐅᖃᓚᐅᖅᑐᖅ.  “ᐱᓐᖑᐊᕐᕕᒃᐳᑦ ᑐᑦᑕᕐᕕᓪᓚᕆᐅᕗᑦ ᐃᓅᓯᖃᑦᑎᐊᒃᑲᓐᓂᐅᑕᐅᓪᓗᑎᒡᓗ ᔫᑳᓐᒥᐅᓕᒫᓄᑦ.”

ᑲᑎᓕᒫᕐᓗᒋᑦ $1.2 ᒥᓕᐊᓐ ᐊᑐᐃᓐᓇᕈᖅᑎᑕᐅᓂᐊᖅᑐᑦ 7-ᓄᑦ ᔫᑳᓐᒦᑦᑐᓄᑦ ᓄᓇᓕᖕᓄᑦ, ᐊᖅᑯᑕᐅᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᒎᖅᑐᑦ ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑮᓇᐅᔭᖁᑏᑦ, ᔫᑳᓐ ᓄᓇᓕᖁᑎᖏᑦ, ᐃᖅᑭᓖᑦ ᐊᒻᒪᓗ ᔫᑳᓐ ᒐᕙᒪᖏᑦ.  ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑮᓇᐅᔭᑦ $550,000 ᑐᖏᑦᑎᐊᑯᓗᐊᓃᑦᑐᑦ ᐊᒻᒪᓗ ᔫᑳᓐ ᒐᕙᒪᒃᑯᖏᑦ ᑕᐃᒪᓐᓇ ᐅᓄᖅᑎᒋᖕᒥᔪᓂᒃ ᐃᓕᓯᓂᐊᕆᓪᓗᑎᒃ.

ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑏᑦ  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᐅᓚᑕᐅᕗᑦ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.  ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᑦ ᑲᓇᑕᒥ ᑲᓇᑕᓕᒫᒧᑦ ᑐᕌᖓᕗᑦ, ᐊᑐᐃᓐᓇᕈᐃᔨᐅᓪᓗᑎᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ $500 ᒥᓕᐊᓐᓂᒃ ᒫᔾᔨ 31, 2011-ᒧᑦ ᑎᑭᓪᓗᒍ.  ᐱᓕᕆᐊᓐᖑᖅᑎᑕᐅᓯᒪᔪᑦ ᐊᑐᖅᑕᐅᓲᖑᕗᑦ ᑮᓇᐅᔭᖅᑐᕈᑎᓄᑦ ᓴᓇᔭᐅᒃᑲᓐᓂᕆᐊᓕᖕᓄᑦ, ᓄᑖᓐᖑᕆᐊᖅᑎᑦᑎᓂᕐᒧᑦ ᐊᖏᒡᓕᒋᐊᖅᑎᑦᑎᓂᕐᒧᓪᓘᓐᓃᑦ ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓄᑦ ᑲᓇᑕᒦᑦᑐᓄᑦ ᓄᓇᓕᖕᓄᑦ.  ᑮᓇᐅᔭᑦ $1.7 ᒥᓕᐊᓐ ᓴᓂᕐᕙᒃᑕᐅᓯᒪᕗᑦ ᐱᓐᖑᐊᕐᕕᖕᓄᑦ ᐱᕈᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᓕᖕᓄᑦ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ. 

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

 ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ
ᑳᑦᓖᓐ ᒪᒃᓚᐅᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᑦ ᐊᖓᔪᖅᑳᖓᑦ
613-995-7766

ᔫᑳᓐ ᒐᕙᒪᒃᑯᖏᑦ
ᕌᒃᓵᓐ ᕚᓕᕚᓐ
ᒥᓂᔅᑕᐃᑦ ᑲᑎᒪᔨᖏᓐᓄᑦ ᑐᓴᐅᒪᔾᔪᑎᓕᕆᓂᖅ
(867) 633-7949
Roxanne.vallevand@gov.yk.ca

ᑲᑕᕆ ᒧᐊᒋᓐ
ᑐᓴᐅᒪᔾᔪᑎᓕᕆᓂᖅ, ᓄᓇᓕᖕᓂ ᐱᔨᑦᑎᕈᑏᑦ
867-456-3938
Cathrine.morginn@gov.yk.ca