ᖃᐅᔨᒪᔨᕐᔪᐊᑦ ᖃᐅᔨᒪᓂᖏᑦᑎᒍᑦ 7-ᓂᒃ ᓄᓇᓂᒃ ᖃᐅᔨᓴᐃᓃᑦ ᔫᑳᓐᒥ

CanNor-09-003

ᐊᖅᑯᑎᒋᓪᓗᒍ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑮᓇᐅᔭᑦ, ᓄᓇᓐᖑᐊᓕᕆᓂᕐᒧᑦ ᑐᕌᖓᔪᑦ ᖃᐅᔨᓴᐃᓃᑦ 7-ᓄᑦ ᑐᕌᖓᓗᐊᖅᑐᑦ ᑮᓇᐅᔭᖃᖅᑎᑕᐅᕗᑦ ᔫᑳᓐᒥ.  ᑲᑎᓕᒫᕐᓗᒋᑦ ᑖᒃᑯᓄᖓ ᑐᕌᖓᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ $250,000-ᖑᕗᑦ.

ᑕᒪᒃᑯᐊ ᐱᓕᕆᐊᑦ ᐃᓚᓕᐅᔾᔨᓯᒪᔪᑦ ᓴᕕᒃᓴᓖᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓇᓃᓐᓂᖏᓐᓂᒃ ᖃᐅᔨᓴᐃᓂᕐᒥᒃ, ᖃᕆᓴᐅᔭᒃᑰᖅᑎᑕᐅᔪᑦ ᑐᓴᐅᒪᔾᔪᑏᑦ ᓄᐊᑕᐅᓯᒪᓂᖏᑦ, ᓄᓇᐅᑉ ᓴᔪᒋᓪᓚᖕᓂᖏᓐᓂᒃ ᖃᐅᔨᓴᐃᓂᖅ, ᓄᓇᓐᖑᐊᓕᐅᕐᓂᐅᑉ ᐱᕙᓪᓕᐊᓂᖏᓐᓂᒃ, ᓴᕕᒃᓴᓖᑦ ᖃᓄᖅ ᑲᑎᖅᓱᖅᓯᒪᓂᖏᓐᓂᒃ ᖃᐅᔨᓴᐃᓃᑦ, ᐃᓕᓐᓂᐊᓯᓐᓈ ᑲᑎᒪᔾᔪᑎᖃᕐᓂᖅ ᓄᓇᐅᑉ ᐅᖅᑰᓯᕙᓪᓕᐊᓂᖓᓂᒃ, ᐊᒻᒪᓗ ᓄᐊᑦᑎᓂᖅ ᐅᔭᕋᖕᓂᐊᕐᓂᓕᕆᓂᕐᒨᖓᔪᓂᒃ ᑎᑎᖅᑲᖁᑎᓂᒃ.  ᑕᒪᒃᑯᐊ ᐱᓕᕆᐊᑦ ᐊᖅᑯᑕᐅᓗᑎᒃ ᑐᑭᓯᒃᑲᓐᓂᐅᑕᐅᓂᐊᖅᑐᑦ ᔫᑳᓐᒥ ᓴᕕᒃᓴᓖᑦ ᐆᒻᒪᖅᑯᑎᓕᐊᕆᔭᐅᔪᓐᓇᖅᑐᓪᓗ ᓇᓃᓐᓂᖏᓐᓂᒃ, ᐃᓚᓕᐅᓪᓗᒍ ᑲᓛᓐᓴᐃᒃᒥ ᓱᑯᑦᑎᐊᓂ ᓴᕕᒃᓴᓖᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓇᓃᒻᒪᖔᖏᓐᓂᒃ.  ᐊᖅᑯᑎᒋᔭᐅᖕᒥᓗᑎᒃ ᐱᐅᓂᖅᓴᓂᒃ ᐊᑐᐃᓐᓇᖃᕐᕕᐅᔪᓐᓇᖅᓯᓂᐊᖅᑐᑦ ᓄᓇᓐᖑᐊᓕᕆᔪᓕᒫᓂᒃ ᑐᓴᐅᒪᔾᔪᑎᓂᒃ ᐃᓘᓐᓇᖏᓐᓄᑦ ᐊᒃᑐᖅᑕᐅᓂᖃᕐᓂᐊᖅᑐᓄᑦ ᐊᒻᒪᓗ ᑐᑭᓯᕚᓪᓕᐅᑕᐅᔪᓐᓇᕐᓗᑎᒃ ᖃᖓ ᓄᓇ ᓴᔪᐱᓪᓚᒐᔭᒃᒪᖔᖓ.  ᑖᒃᑯᐊᖑᓚᐅᖅᑎᓪᓗᒋᑦ, ᓴᖅᑭᑦᑎᓂᐊᖅᑐᑦ ᐊᑑᑎᖃᑦᑎᐊᕐᓂᖅᓴᒃᑯᑦ ᐊᐅᓚᑦᑎᑦᑎᐊᒃᑲᓐᓂᕈᑎᒃᓴᓂᒃ ᓄᓇᒥᐅᑕᓂᒃ, ᑐᓐᖓᕕᖃᑦᑎᐊᕐᓂᖅᓴᐅᔪᓂᒃ ᐱᔪᒥᓇᕐᓂᖅᓴᐅᔪᓂᒡᓗ ᑮᓇᐅᔭᓂᒃ ᓴᒡᕙᐃᓂᕐᒥᒃ ᔫᑳᓐ ᑮᓇᐅᔭᓕᐅᕋᓱᐊᖅᑎᖏᓐᓄᑦ, ᒪᑭᒪᑦᑎᐊᕈᓐᓇᕐᓂᖅᓴᑦ ᔫᑳᓐᒥ ᓴᕕᒃᓴᖅᓯᐅᕐᓂᖅ, ᐊᒻᒪᓗ ᐅᓗᕆᐊᓇᕈᑕᐅᕙᒃᑐᑦ ᒥᒃᖠᕚᓪᓕᕐᓗᑎᒃ ᐱᖁᑎᕐᔪᐊᓕᕆᓂᕐᒧᑦ ᑐᕌᖓᔪᓂᒃ ᑮᓇᐅᔭᓕᖅᓯᓂᐊᕐᓗᓂ. 

1. ᑐᕌᖅᑕᐅᓪᓗᐊᑕᖅᑐᑦ ᓴᕕᒃᓴᓖᑦ ᑮᓇᐅᔭᓕᐅᕈᑕᐅᓗᐊᓐᖑᐊᕋᔭᖅᑐᓄᑦ ᖃᐅᔨᓴᐅᑏᑦ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $75,000
   
   ᑮᓇᐅᔭᓐᖑᕈᓐᓇᖅᑐᑦ ᐅᔭᖅᑲᑦ ᐅᔭᕋᖕᓂᐊᖅᑕᐅᓂᖏᑦ, ᑰᖕᓂᒃᑯᑦ ᓄᐊᑕᕕᓃᑦ ᐅᔭᕋᑦᑎᐊᕙᐃᑦ ᐅᔭᕋᒃᓯᐅᖅᑕᐅᓂᖏᑦ, ᔫᑳᓐᒥᐅᑦ ᑮᓇᐅᔭᓕᐅᕋᓱᐊᕈᑎᖏᓐᓄᑦ ᐊᒃᓱᐊᓗᒃ ᐱᕚᓪᓕᐊᑕᐅᓂᐊᖅᑐᑦ ᐊᕐᕌᒍᑦ 100 ᐅᖓᑖᓄᑦ.  ᑕᐃᒪᐃᒃᑲᓗᐊᖅᑎᓪᓗᒍ, ᑲᓛᓐᑕᐃᒃᒥ ᐅᔭᕋᒃᓯᐅᕐᓂᖅ ᐊᒥᓱᓂ ᑰᖕᓂ ᐊᒃᓱᐊᓗᒃ ᑲᑕᒃᐸᓪᓕᐊᓯᒪᔪᖅ.  ᑐᕌᒐᕆᔭᐅᓗᐊᓐᖑᐊᖅᑐᑦ ᓴᕕᒃᓴᑦᑎᐊᕙᓖᑦ ᖃᐅᔨᓴᖅᑕᐅᓂᖏᑦ ᑕᓪᓕᒪᐃᓕᖓᑎᑕᐅᓗᐊᓐᖑᐊᖅᖢᑎᒃ ᖃᐅᔨᓴᖅᑕᐅᕗᑦ ᐊᑕᐅᓯᐅᓐᖏᑦᑐᓄᑦ ᓯᓚᑦᑐᖅᓴᕐᕕᒡᔪᐊᕐᓄᑦ.  ᑕᒪᒃᑯᐊ ᑲᑎᑕᐅᓐᓇᕆᓗᒋᑦ, ᖃᐅᔨᓴᐃᓂᐊᖅᑐᒍᑦ ᖃᓄᖅ ᐊᖏᑎᒋᖕᒪᖔᖏᑦ ᖃᐅᔨᒪᔭᐅᓐᖏᑦᑐᑦ ᒎᓗᖃᕐᕖᑦ ᕿᓂᕐᕕᐅᕙᓚᐅᖅᓯᒪᔪᓃᑦᑐᑦ ᓱᓕ, ᑐᑭᓯᓇᓱᒃᑲᓐᓂᕐᓗᒋᑦ ᖃᓄᑎᒋ ᐊᑭᑐᔪᒃᓴᓂᒃ ᐱᑕᖃᐅᕐᒪᖔᖓ ᐊᑎᒃᑲᓐᓂᖏᓐᓂ ᐊᒻᒪᓗ ᑭᓲᖕᒪᖔᖏᑦ ᔫᑳᓐᒦᑦᑐᑦ, ᐊᒻᒪᓗ ᑐᑭᓯᒃᑲᓐᓂᕐᓗᑕ ᖃᓄᑎᒋ ᓴᕐᕙᐅᕙᓪᓕᐊᖕᒪᖔᖏᑦ ᓯᐅᕋᐃᑦ ᑰᓃᑦᑐᑦ.  ᑕᒪᒃᑯᐊ ᐱᓕᕆᐊᑦ ᐃᑲᔫᑕᐅᓪᓚᕆᖕᓂᐊᖅᑐᑦ ᓵᕝᕕᒋᓂᐊᖅᑕᑦᑎᓐᓄᑦ ᓄᓇᒥᐅᑕᓂᓐᖔᖅᑐᓄᑦ ᐃᓚᖏᓐᓂ ᑐᑭᓯᕕᒋᔪᒪᓗᐊᓐᖑᐊᖅᑕᑦᑎᓐᓂ, ᑕᐃᒪᐃᓐᓂᖓᓄᓪᓗ ᐅᓗᕆᐊᓇᖅᑐᖅᓯᐅᓐᖏᓐᓂᖅᓴᐅᓕᕈᓐᓇᕐᓂᐊᖅᖢᑎᒃ ᐅᔭᕋᒃᓯᐅᖅᑏᑦ ᐊᒻᒪᓗ ᖃᓄᖅ ᐊᒃᑐᐃᓂᖃᖃᑦᑕᕐᒪᖔᖏᑦ ᐊᕙᑎᒥᒃ ᐅᔭᕋᑦᑎᐊᕙᒃᓯᐅᖅᑏᑦ.
   
   
2. ᓄᓇᓕᕆᔪᑦ ᖃᕆᓴᐅᔭᒃᑰᖅᑎᑕᐅᓂᖏᑦ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $50,000
   
   ᐅᓪᓗᒥᒧᑦ ᐊᓐᖑᑎᔪᑦ ᑐᓴᐅᒪᔾᔪᑏᑦ ᑕᕝᕙᐅᕗᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᓐᖓᕕᒋᔭᐅᔪᑦ ᐅᔭᕋᒃᓯᐅᕐᓂᖅ ᐱᔾᔪᑎᒋᓪᓗᒍ.  ᔫᑳᓐᒥ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᖓᑦ ᐊᐅᓚᑦᑎᓲᖑᕗᑦ ᐊᑕᐅᓯᐅᓐᖏᑦᑐᓂᒃ ᖃᕆᓴᐅᔭᒃᑰᖅᑎᑕᐅᓯᒪᔪᓂᒃ, ᑲᑎᓪᓗᒋᑦ ᐊᔾᔨᒌᓐᖏᕈᓘᔭᖅᑐᓂᒃ ᐃᓗᓕᖃᐅᖅᑐᑦ ᐊᒻᒪᓗ ᐱᔾᔪᑎᖃᐅᖅᖢᑎᒃ ᔫᑳᓐ ᓄᓇᖓᑕ ᖃᓄᐃᓕᖓᓂᖓᓂᒃ ᐊᒻᒪᓗ ᖃᓄᐃᑦᑐᓂᒃ ᓴᓇᕐᕈᑎᓂᒃ ᐊᑐᐃᓐᓇᖅᑕᖃᐅᕐᒪᖔᖓ.  2008-ᖑᑎᓪᓗᒍ, ᔫᑳᓐᒥ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᖓᑦ ᑲᑎᖅᓱᐃᓯᒋᐊᓚᐅᖅᓯᒪᔪᑦ ᐊᔾᔨᒌᓐᖏᑦᑐᓂᒃ ᖃᕆᓴᐅᔭᒃᑰᖅᑎᑕᐅᓯᒪᔪᓂᒃ, ᐊᑕᐅᓯᕐᒧᑦ ᐃᓕᐅᖅᑲᖅᓗᓂᒋᑦ.  ᑕᒪᑐᒪ ᐱᓕᕆᐊᕆᔭᐅᓂᖓ ᐃᓱᓕᕝᕕᖃᕐᓂᐊᖅᑐᖅ ᖃᕆᓴᐅᔭᒃᑰᖅᑎᑕᐅᓯᒪᔪᓂᒃ ᐆᒃᑐᕋᐃᓗᑎᒃ ᐊᒻᒪᓗ ᐋᖅᑭᒃᓱᐃᓗᑎᒃ ᑕᑕᑎᕆᐊᓕᖕᓂᒃ ᐃᓗᓪᓕᖅᓱᖅᑕᐅᕙᓪᓕᐊᖃᑦᑕᕋᔭᖅᑐᓂᒃ.
   
   
3. ᓄᓇᐅᑉ ᓴᔪᐱᓪᓚᖃᑦᑕᕐᓂᖓᑕ ᓇᐅᑦᑎᖅᓱᖅᑕᐅᓂᖓ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $40,000
   
   ᑕᒪᓐᓇ ᐱᓕᕆᐊᖑᔪᖅ ᐊᑐᖅᑕᐅᑎᓪᓗᒍ ᐃᓕᓯᓂᐊᖅᑐᑦ ᓄᓇᐅᑉ ᐊᐅᓚᔾᔭᖕᓂᖓᓄᑦ ᖃᐅᔨᓴᐅᒻᒥᒃ ᑎᓈᓕᒥ (ᐊᓛᔅᑲᐅᑉ ᐊᖅᑯᑎᕐᔪᐊᖓᑕ ᖃᓂᒋᔮᓄᑦ).  ᐊᒻᒪᓗ, ᐊᑕᐅᓯᐅᓐᖏᑦᑐᑦ ᖃᐅᔨᓴᐅᑏᑦ ᐃᓕᐅᖅᑲᖅᑕᐅᓂᐊᕐᒥᔪᑦ ᖃᐅᔨᓴᐃᔾᔪᑎᓂᒃ ᓄᓇᐅᑉ ᓄᑎᒡᕕᕕᓂᖏᓐᓂ, ᖃᓄᑎᒋ ᐊᐅᓚᔾᔭᒃᓯᒪᓕᕐᒪᖔᖏᓐᓂᒃ ᖃᐅᔨᓴᐅᑎᓂᒃ.  ᓄᓇᐅᑉ ᓴᔪᐱᓪᓚᖕᓂᖏᓐᓂᒃ ᖃᐅᔨᓴᐃᓂᖅ ᐊᒃᓱᐊᓗᒃ ᐱᒻᒪᕆᐅᔪᖅ ᑕᒪᒃᑮᖕᓄᑦ ᐱᖁᑎᕐᔪᐊᓄᑦ ᐊᒻᒪᓗ ᐊᕙᑎᑦᑕ ᓴᐳᒻᒥᐅᓯᖅᑕᐅᓯᒪᓂᖓᓄᑦ.
   
   
4. ᓄᓇᓐᖑᐊᓕᕆᔪᑦ ᖃᕆᓴᐅᔭᒃᑰᖅᑎᑕᐅᓯᒪᔪᑦ ᖃᐅᔨᓴᖅᑕᐅᒃᑲᓐᓂᕆᐊᖃᕐᓂᖏᑦ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $32,000
   
   ᑎᓴᒪᑦ ᐊᕐᕌᒍᑦ ᐊᓂᒍᖅᓯᒪᔪᓂ, ᔫᑳᓐᒥ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᖓ ᐅᓄᖅᑐᒻᒪᕆᖕᓂᒃ ᓯᓚᒃᑰᖅᑐᓂᒃ magnetic, radiometric and electromagnetic-ᓅᖓᔪᓂᒃ ᖃᕆᓴᐅᔭᒃᑯᑦ ᓄᐊᑦᑎᕙᓪᓕᐊᓯᒪᔪᑦ.  ᑕᒪᒃᑯᐊ ᐋᖅᑭᒃᓱᖅᑕᐅᓯᒪᓐᖏᒻᒪᑕ ᐋᖅᑭᒃᓱᖅᑕᐅᔭᕆᐊᓖᑦ, ᑐᓴᐅᒪᔾᔪᑎᒃᑲᓐᓃᑦ ᑖᒃᑯᓄᖔᖅᑐᑦ ᖃᐅᔨᔭᐅᒃᑲᓐᓂᕈᓐᓇᕐᓂᐊᕐᒪᑕ.  ᐱᓕᕆᖑᑎᓪᓗᒍ ᖃᐅᔨᓴᐃᖃᓯᐅᔾᔨᓂᐊᖅᑐᑦ ᐅᔭᖅᑲᑦ, ᑐᑭᓯᒃᑲᓐᓂᕋᓱᒡᓗᑎᒃ ᖃᓄᐃᑦᑑᖕᒪᖔᖏᓐᓂᒃ, ᖃᐅᔨᓴᐃᓃᑦ ᐊᑯᓐᓂᖏᓐᓂ ᑲᑎᖅᓱᖅᑕᕕᓃᑦ ᖃᓄᐃᑦᑐᓂᒃ ᓴᖅᑭᑦᑎᖕᒪᖔᖏᑦ, ᐊᒻᒪᓗ ᓄᓇᓐᖑᐊᓕᐅᕐᓗᑎᒃ ᑕᒪᒃᑯᐊ ᓱᑯᑦᑎᐊᓃᒻᒪᖔᖏᑦ ᖃᐅᔨᔭᐅᔪᓐᓇᕐᓂᐊᕐᒪᑕ.
   
   
5. ᓄᓇᒥᓐᖔᖅᑐᑦ ᖃᐅᔨᓴᒐᒃᓴᓕᐊᕕᓃᑦ ᑲᑎᖅᓱᖅᑕᐅᓂᖏᑦ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $25,000
   
   ᐊᕐᕌᒍᑦ 30 ᐊᓂᒍᖅᓯᒪᓕᖅᑐᓂ, ᑰᖕᓂᓐᖔᖅᑐᓂᒃ ᖃᐅᔨᓴᖅᑕᐅᔪᒃᓴᓂᒃ ᓄᐊᑦᑎᖃᑦᑕᖅᓯᒪᔪᑦ ᐊᒻᒪᓗ ᐅᔭᖅᑲᓂᒃ ᖃᐅᔨᓴᐃᖃᑦᑕᖅᓯᒪᓪᓗᑎᒃ ᑰᖕᓂᓐᖔᖅᑐᓂᒃ, ᑕᒪᒃᑯᐊᓗ ᐱᔭᕇᖅᑕᐅᓯᒪᓕᖅᖢᑎᒃ.  ᑲᑎᖅᓱᖅᑕᕕᓃᑦ ᐃᑲᔫᑕᐅᕗᑦ ᐅᔭᕋᒃᓯᐅᖅᑎᓄᑦ ᐊᒻᒪᓗ ᐊᕙᑎᒥᒃ ᖃᐅᔨᓴᐃᓂᕐᓄᑦ.  ᖃᐅᔨᓴᖅᑕᕕᓃᑦ ᓇᓕᖅᑯᑦᑎᓂᖏᑦ ᐊᒻᒪᓗ ᐱᕙᓪᓕᐊᑎᑕᐅᓂᖏᑦ ᓄᑖᑦ ᖃᐅᔨᓴᖅᑕᐅᔪᒃᓴᑦ ᐊᕐᕌᒍᑦ 30 ᐃᓗᐊᓂ ᐃᓚᖓᒍᑦ ᐱᔭᕐᓂᖃᑦᑕᓐᖏᑦᑐᑦ ᑖᒃᑯᐊ ᓄᐊᑕᕕᓂᑐᖃᐃᑦ ᐊᑐᕋᓱᒃᖢᒋᑦ.  ᑕᒪᓐᓇ ᐱᓕᕆᐊᖑᑎᓪᓗᒍ ᑕᒪᒃᑮᒃ ᐊᑐᖅᑕᐅᓂᐊᖅᑐᑦ ᑰᒃᖕᓃᑦᑐᑦ ᖃᐅᔨᓴᖅᑕᕕᓃᑦ ᐊᒻᒪᓗ ᐃᒪᐅᑉ ᖃᓄᐃᓐᓂᖓ, ᐃᓚᓕᐅᖢᒍ ᖃᓄᐃᑦᑐᓂᒃ ᐊᑐᖅᖢᑎᒃ ᑕᒪᒃᑯᐊ ᖃᐅᔨᓴᖅᑕᐅᓚᐅᖅᓯᒪᖕᒪᖔᖏᑦ. 
   
   
6. ᓄᓇᐅᑉ ᐅᖅᑰᓂᖓᓅᖓᔪᓂᒃ ᑐᓴᐅᒪᔾᔪᑎᓂᒃ ᖃᐅᔨᓴᐃᓂᖅ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $23,000
   
   ᑕᒪᑐᒪᓂ ᐋᖅᑭᒃᓱᐃᓂᐊᖅᑐᒍᑦ ᖃᐅᔨᒪᔨᑕᒻᒪᕇᑦ ᐊᒻᒪᓗ ᐊᒃᑐᖅᑕᐅᓂᖃᕐᓂᐊᖅᑐᑦ ᐃᓕᓐᓂᐊᓯᓐᓈ ᑲᑎᒪᓂᖃᕈᓐᓇᕐᓂᐊᕐᒪᑕ ᐊᒻᒪᓗ ᖃᐅᔨᓴᐃᓗᑎᒃ ᓇᐅᒃᑯᑦ ᖃᐅᔨᒪᔭᐅᔪᑦ ᑭᑭᑦᑎᓯᒪᖕᒪᖔᖏᓐᓂᒃ ᐊᒻᒪᓗ ᖃᓄᐃᑦᑐᓂᒃ ᑐᓴᐅᒪᔾᔪᑎᓂᒃ ᓄᐊᑦᑎᔭᕆᐊᖃᕐᓂᐊᕐᒪᖔᖏᑦ ᔫᑳᓐᒥ ᓄᓇᐅᑉ ᐅᖅᑰᓂᖓ ᐱᔾᔪᑎᒋᓪᓗᒍ.  ᑐᓴᐅᒪᔾᔪᑏᑦ ᐊᒻᒪᓗ ᖃᐅᔨᒪᔭᐅᔪᑦ ᐊᒥᖅᑳᖅᑕᐅᓂᖓ ᐱᒻᒪᕆᐅᓂᐊᖅᑐᖅ ᓯᕗᓂᒃᓴᑦᑎᓐᓂ ᐅᔭᕋᒃᓯᐅᖃᑦᑕᕐᓂᐊᖅᑐᓄᑦ ᔫᑳᓐᒥ. 
   
   
7. ᐅᔭᕋᖕᓂᐊᕐᓂᓕᕆᓂᕐᒨᖓᔪᑦ ᐸᐃᑉᐹᖁᑏᑦ
   ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $5,000
   
   ᔫᑳᓐᒥ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᒃ ᐊᑕᐅᓯᐅᓐᖏᑦᑐᓂᒃ ᐱᑐᖃᕐᓂᖅ ᑎᑎᖅᑲᖁᑎᖃᐅᖅᑐᑦ ᐅᔭᕋᖕᓂᐊᕐᓂᓕᕆᓂᕐᒥᒃ ᐅᔭᕋᒃᓯᐅᕐᓂᕐᒥᒡᓗ ᐅᖃᐅᓯᓕᖕᓂᒃ, ᐊᒻᒪᓗ ᑕᒪᒃᑯᐊ ᐱᓂᑯᒋᓪᓗᓂᒋᑦ ᐅᔭᕋᒃᓯᐅᖅᑎᓂᑦ.  ᑕᒪᒃᑯᐊ ᑎᑎᖅᑲᑐᖃᐃᑦ ᐃᓗᓕᖃᐅᖅᑐᑦ ᑐᓴᕈᒥᓇᖅᑐᓂᒃ ᐅᖃᓕᒫᖅᑕᐅᔪᒪᓇᔭᖅᑐᒃᓴᐅᔪᓂᒃ ᐅᔭᕋᒃᓯᐅᖅᑎᓄᑦ ᐊᒻᒪᓗ ᐃᓗᓕᖃᐅᑐᐃᓐᓇᕆᐊᖃᖅᖢᑎᒃ ᐊᕙᑎᓕᕆᓂᕐᒧᑦ ᖃᐅᔨᓴᐃᔾᔪᑎᓄᑦ ᐃᓕᖃᓯᐅᔾᔭᐅᔪᒥᓇᖅᑐᓂᒃ.  ᑕᒪᒃᑯᐊ ᐱᓕᕆᐊᖑᔪᖅ ᐊᖅᑯᑕᐅᓗᓂ ᓄᐊᑕᐅᔪᑦ ᐃᓚᓕᐅᔾᔭᐅᔪᓐᓇᕐᓂᐊᖅᑐᑦ ᒫᓐᓇ ᑎᑎᖅᑲᖁᑎᑐᖃᕆᔭᐅᔪᓄᑦ ᐊᒻᒪᓗ ᐃᖅᑲᓇᐃᔭᖃᑎᒋᔭᐅᓗᑎᒃ ᔫᑳᓐᒥ ᓄᓇᓐᖑᐊᓕᕆᔩᑦ ᐱᑐᐃᓐᓇᐅᓐᖏᑦᑐᓕᕆᔨᖏᑦ, ᓇᓗᓇᐃᖅᓯᔪᓐᓇᕐᓂᐊᕐᒪᑕ ᒪᓕᒐᓂᒃ ᐋᖅᑭᒃᓱᐃᔾᔪᑕᐅᓂᐊᖅᑐᓂᒃ ᑭᓱᑦ ᓯᕗᓪᓕᐅᔾᔭᐅᔭᕆᐊᖃᕐᒪᖔᑦ ᑎᑎᖅᑲᑦ, ᐸᐸᑕᐅᑯᑖᒍᓐᓇᕐᓂᐊᕐᒪᑕ ᐊᒻᒪᓗ ᑕᖅᑲᐅᖓ ᐊᑐᐃᓐᓇᕈᖅᑎᑕᐅᒃᑲᓐᓂᕈᓐᓇᕐᓂᐊᕐᒪᑕ.

ᐱᓕᕆᐊᖑᔪᓕᒫᑦ ᑕᖅᑲᐅᖓ ᑎᒍᓇᒃᑕᐅᔪᓐᓇᖅᑐᓂᒃ ᓄᓇᓐᖑᐊᓕᐅᖅᐸᓪᓕᐊᓂᐊᖅᑐᑦ, ᐅᓂᒃᑳᓕᐅᕐᓗᑎᒃ ᐊᒻᒪᓗ/ᐅᕝᕙᓘᓐᓃᑦ ᑎᑎᖅᑲᖁᑏᑦ ᓯᐊᒻᒪᒃᑎᖅᑕᐅᓗᑎᒃ ᔫᑳᓐᒥ ᓄᓇᓐᖑᐊᓕᕆᔨᓄᑦ, ᐱᓐᖏᑕᑐᐊᕆᓗᒋᑦ ᑕᐃᒃᑯᐊ ᖃᕆᓴᐅᔭᕐᓄᑦ ᑐᖅᑯᖅᑕᐅᕙᓪᓕᐊᓂᐊᖅᑐᑦ, ᑖᒃᑯᐊᓕ ᐊᑐᖅᑕᐅᓂᐊᕐᒪᑕ ᔫᑳᓐᒥ ᓄᓇᓐᖑᐊᓕᕆᔨᖏᓐᓄᑦ.

ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ

2009-10-ᒥ ᓄᓇᓐᖑᐊᓕᕆᓂᖅ ᑮᓇᐅᔭᖃᖅᑎᑕᐅᔪᖅ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ (ᑮᓇᐅᔭᑦ ᐊᑐᕈᒫᕐᓂᐊᖅᑐᑦ 2009) ᓄᑖᓐᖑᕆᐊᖅᑎᑦᑎᕗᑦ ᑮᓇᐅᔭᓂᒃ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒎᖅᑐᓂᒃ, $90 ᒥᓕᐊᓐᖑᓪᓗᑎᒃ ᐊᕐᕌᒍᓄᑦ ᑕᓪᓕᒪᓄᑦ.  ᑮᓇᐅᔭᑦ ᐊᑐᐃᓐᓇᐅᔪᑦ ᐊᒡᒍᖅᑐᖅᑕᐅᖃᑦᑕᖅᐳᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓄᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ, ᖃᐅᔨᒋᐊᕈᓐᓇᖅᑕᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᖃᕆᓴᐅᔭᒃᑰᖅᑎᓯᒪᔭᖏᑦ, ᐅᕘᓇ: www.north.gc.ca .

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᖃᐅᔨᒃᑲᐃᔾᔪᑏᑦ ᓇᓗᓇᐃᖅᓯᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓕᐊᕕᓂᖏᓐᓂᒃ, ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓᓂᒃ,  ᓴᐳᒻᒥᐅᓯᖅᓯᓯᒪᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᕐᓂᒃ, ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕚᓪᓕᐅᑕᐅᔪᓐᓇᖅᑐᓂᒃ, ᐊᒻᒪᓗ ᐱᐅᓯᒋᐊᖅᑎᑦᑎᓗᑎᒃ ᓴᓐᖏᓂᖅᑖᖅᑎᑦᑎᓗᑎᒡᓗ ᐅᑭᐅᖅᑕᖅᑑᑉ ᐊᐅᓚᑕᐅᓂᖏᓐᓂᒃ.